Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 543 Hüküm no: 834 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Feyzullah’ın Ali Ağa’ya olan borcunu ödemesi Ma‘rûz; Mahmiye-i İslâmbol’da Tahmis kurbünde sâkin Ali Ağa b. İbrahim nâm kimesne medîne-i Üsküdar’da mahfil-i bâbda meclis-i şer‘-i hatîrde Kahveci es-Seyyid Feyzullah b. es-Seyyid Ömer nâm kimesne mahzarında mezbûr es-Seyyid Feyzullah târih-i i‘lâmdan beş sene mukaddem istidâne ve kabz ve umûruna sarfla istihlâk eylediği altmış beş guruş ve yine yedimden iştirâ ve kabz eylediği kıyye ve fiyâtı beynimizde ma‘lûm kahve semeninden ba‘de-külli’l-hesâb bâkī kırk dokuz guruş ki cem‘an yüz on dört guruş ciheteyn-i mezkûreteynden zimmetinde hakkım olup hatta meblağ-ı merkūm bana deyni olmağla işbu bin iki yüz beş senesi Şevvâli’l-mükerrem’in on birinci günü târihiyle müverrah karz unvânıyla yedime temessük dahi vermiş idi deyü bir kıt‘a deyn temessüğü ibrâzıyla ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yüz on dört guruşun müdde‘î-i mezbûra edâsıyla mezbûr es-Seyyid Feyzullah ilzâm olunduğu bi’l-iltimâs huzûr-ı âlîlerine i‘lâm olundu. Fî 18 min-Zilhicce sene 1205