Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 543 Hüküm no: 835 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan v. Bâğdik’in Kirkor ve Ohannes kardeşler hakkında açtığı kefalet davasına itibar edilmediği Ma‘rûz; Medîne-i Üsküdar’da Hamzafakih mahallesinde vâki‘ değirmende mütemekkin Arslan v. Bâğdik nâm zimmî medîne-i mezbûrede mahfil-i bâbda meclis-i şer‘-i hatîrde Kirkor ve Ohannes veledey Agik nâm karındaşları muvâcehelerinde bin yüz doksan sekiz senesi Saferi’l-hayr’ın on üçüncü günü târihiyle müverraha işbu yedimde olan bir kıt‘a temessükleri mûcebince merkūmân Kirkor ve Ohannes ile gāib ani’l-meclis Arot nâm zimmîler yedimden istikrâz ve kabz ve umûrlarına sarfla istihlâk eyledikleri yüz on guruş hakkımın zimmetlerine edâsı lâzım gelen meblağa her biri müte‘âkiben bi’l-emr ve’l-kabûl kefîl ve dâminler olmağın asâlet ve kefâletlerine binâen meblağ-ı merkūmun altmış guruşunu yedlerinden ahz ü kabz ve elli guruşu bâkī zimmetlerinde hakkım kalmağla hâlâ taleb ederim deyü da‘vâ onlar dahi cevâblarında müdde‘î-i merkūm kabzını mu‘terif olduğu altmış guruşdan ziyâde elli guruş ahzlarını ve kefâletlerini inkâr etmeleriyle müdde‘î-i merkūm ber-vech-i muharrer müdde‘âsını isbâta kādir olamayıp talebiyle merkūmân Kirkor ve Ohannes’den her birileri gıbbe’t-tahlîfi’ş-şer‘î mûcebiyle müdde‘î-i merkūm husûs-ı mezkûrda merkūmân Kirkor ve Ohannes zimmîlere bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 6 min-M sene 1206