Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 545 Hüküm no: 839 Orijinal metin no: [68b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Mahmud’un Ahmed Ağa’dan alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Şücabağı mahallesi sükkânından Ömer b. Mahmud nâm kimesne mahfil-i bâbda meclis-i şer‘-i hatîrde Ahmed Ağa b. Mehmed Emin mahzarında mezbûr Ahmed Ağa târih-i i‘lâmdan üç sene mukaddem bir husûs içün vilâyet-i Rumeli’nde Gümülcine kazâsına mübâşeret ile azîmeti esnâsında Paşakapısı’nda karakulak odasında yedimden istikrâz ve kabz eylediği elli guruş ve mezbûr Ahmed Ağa’nın hizmetinde olmamla kazâ-i mezbûrda etbâ‘ içün verilen hizmetden benim hisseme isâbet eden otuz guruşu dahi bana edâ ve teslîm etmeyip zimmetinde kaldığından mâ‘adâ bi-şarti’r-rücû‘ emriyle esnâ-i râhda umûr-ı lâzımesine harc ü sarf eylediğim doksan dört buçuk guruş ki cem‘an yüz yetmiş dört buçuk guruşu hâlâ taleb ederim deyü da‘vâ, mezbûr Ahmed cevâbında müdde‘î-i mezbûrun müdde‘âsı olan cihet-i karzdan elli guruş ve hizmet nâmıyla verilen otuz guruş ve esnâ-i râhda emriyle sarf eylediği ancak on beş guruş ki cem‘an doksan beş guruşu müdde‘î-i mezbûr Ömer’e def‘ ü teslîm edip zimmetim berî olmuşdur deyü ba‘de’d-def‘ müdde‘î-i mezbûrun ziyâde müdde‘âsı olan yetmiş dokuz buçuk guruş ile makbûzu olan doksan beş guruşu tarafeynden her biri inkâr etmeleriyle dâfi‘-i mezbûr Ahmed Ağa ber-vech-i muharrer eylediği def‘ini udûlden es-Seyyid Ali b. Mehmed ve İbrahim b. Ebûbekir nâm kimesneler şehâdetleriyle mezbûr Ömer muvâcehesinde ba‘de’l-isbât müdde‘î-i mezbûr ziyâde müdde‘âsı olan yetmiş dokuz buçuk guruşu beyândan izhâr-ı acz edip bi’t-taleb mezbûr Ahmed Ağa gıbbe’t-tahlîfi’ş-şer‘î mûcebiyle müdde‘î-i mezbûr Ömer husûs-ı merkūmda mezbûr Ahmed Ağa’ya bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 12 min-M sene 1206