Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 547 Hüküm no: 842 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası ile iyi geçinmesi hakkında Ümmühani Hanım’a tenbihte bulunulduğu Ma‘rûz; Medîne-i Üsküdar’a tâbi‘ Ören karyesinde sâkin Osman b. Mehmed medîne-i mezbûrede meclis-i şer‘-i hatîrde karye-i mezbûre imâmı Molla Abdullah b. Mustafa muvâcehesinde er karındaşım kızı olup işbu hâzıratü bi’l-meclis Ümmühani bt. İbrahim nâm hatun mezbûr Molla Abdullah’ın zevce-i menkûhası olup mezbûr Molla Abdullah zevcesi mezbûre Ümmühani’yi bi-gayrı hakkın darb edip hatta târih-i i‘lâmdan üç ay mukaddem darb etmemek üzere şart ve ta‘lîk etdikden sonra yine darb edip ol-vechile boş olmuşdur deyü da‘vâ ve zevc-i mezbûr Molla Abdullah dahi zevcesi mezbûre Ümmühani Hatun içün bana mutâva‘at etmeyip hilâf-ı rızâm hareket eder deyü da‘vâ ve beynlerinde ba‘de vukû‘ı’l-münâza‘a zevc-i mezbûrun keyfiyet-i hâli karye-i mezbûre ahâlisinden işbu hâzırûn bi’l-meclis Veli Ağa b. el-Hâc Süleyman ve Bekir b. Ahmed ve Hasan Beşe b. Hüseyin ve Mehmed b. Mustafa ve Ömer b. Osman ve Hüseyin b. Ahmed ve Mehmed b. Ahmed nâm kimesnelerden istihbâr olundukda mezbûr Molla Abdullah kendi hâlinde ırzıyla mukayyed ve zevcesi mezbûre Ümmühani Hatun’a hilâf-ı şer‘ vaz‘ ve hareketi dahi ma‘lûmumuz olmayıp ancak ammisi mezbûr Osman mezbûre Ümmühani Hatun’u tahrîk ve mezbûr Molla Abdullah’ı ta‘cîz eder deyü mezbûr Molla Abdullah’ın hüsn-i hâlini ba‘de’l-ihbâr zevce-i mezbûre Ümmühani Hatun hâlâ zevci mezbûr Molla Abdullah’a mutâva‘at etmek üzere tenbîh olunduğu bi’l-iltimâs huzûr-ı âlîlerine i‘lâm olundu. Fi 13 min-M sene 1206