Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 547 Hüküm no: 843 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hanım’ın Ayşe bt. Abdullah’ın evinden eşya çaldığı yolundaki iddiaların ispatlanamadığı Ma‘rûz; Medîne-i Üsküdar’da Turbali mahallesinde sâkine Âişe bt. Abdullah nâm hatunun zevci ve tarafından ber-vech-i âtî da‘vâ ve husûmete vekîl olduğu zâtını ârifân Salih Ağa b. Mehmed Ali ve es-Seyyid Hüseyin b. Abdurrahman nâm kimesneler şehâdetleriyle sâbit olan İbra[hi]m b. Halil nâm kimesne mahfil-i bâbda meclis-i şer‘-i hatîrde mu‘arrefetü’z-zât Rahime bt. Abdullah nâm Zenciye muvâcehesinde mezbûre Rahime târih-i i‘lâmdan dört ay mukaddem mahalle-i mezbûrede vâki‘ müvekkilem mezbûrenin menziline duhûl ve eşyâ-i memlûkesinden doksan guruş kıymetli başları çiçekli bir turuncu şalını ahz etmekle mevcûde ise aynı[nı] müstehleke ise ba‘de’s-sübût kıymet-i şer‘iyesini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i vekîl-i mezbûr ber-vech-i muharrer müdde‘âsını beyân içün ba‘de’l-istimhâl ve’l-imhâl müddet-i mehl-i şer‘î tamam ve beş gün dahi mürûr edip bir vechile müdde‘âsını beyân ve isbât edemeyip tahlîfe dahi tâlib olmamağla müdde‘î-i vekîl-i mezbûr da‘vâ-yı mezkûresiyle mezbûre Rahime Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Z sene 1205