Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 548 Hüküm no: 844 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatar Ömer’in vekili olduğu Ayşe Hanım’a davadan kazandığı paradan kalan borcunu ödemesi Ma‘rûz; Medîne-i Üsküdar’da Selmanağa mahallesi sâkinlerinden Mehmed ve Ümmügülsüm nâm sagīrânın vasîleri ve anaları mu‘arrefetü’z-zât Âişe bt. Ahmed nâm hatun medîne-i mezbûrede mahfil-i bâbda meclis-i şer‘-i hatîrde Tatar Ömer b. Mahmud nâm kimesne mahzarında târih-i i‘lâmdan üç ay mukaddem zevcim olup bundan akdem Gemlik kazâsına tâbi‘ Kurşunlu karyesinde mecrûhan fevt olan es-Seyyid Ebûbekir b. Mustafa’nın dem ü diyetini taleb ve da‘vâya tarafımdan bâ-hüccet-i şer‘iye mezbûr Tatar Ömer’i tevkîl eylediğimde ol dahi vekâlet-i merkūmeyi kabûl ve kazâ-i mezbûrda husemâmız ile lede’l-mürâfa‘a dokuz yüz guruş bedel-i makbûza sulh olup bedel-i merkūm dokuz yüz guruşun yirmi yedi guruşunu bana def‘ u teslîm ve sekiz yetmiş üç guruş hakkımız mezbûr Tatar Ömer zimmetinde bâkī kalmağla hâlâ taleb ederim deyü da‘vâ ve mezbûr Tatar Ömer cevâbında bedel-i sulh olmak üzere ancak yüz otuz guruş kabzını ikrâr ve müdde‘iye-i mezbûrenin ziyâde müdde‘âsı olan yedi yüz kırk üç guruşu inkâr etmeğin müdde‘iye-i mezbûre ber-vech-i muharrer ziyâde müdde‘âsını beyâna ba‘de’l-havâle mezbûr Tatar Ömer’in mukırr u mu‘terif olduğu meblağ-ı merkūm yüz otuz guruşun otuz üç guruşunu mezbûr Tatar Ömer’in ecr-i misl ve harc-ı fermân ve ücret-i râh içün müdde‘iye bi’t-terâzî hatt ve tenzîl, bâkī doksan yedi guruşu müdde‘iye-i mezbûre Âişe Hatun’a edâ ve teslîme mezbûr Tatar Ömer’e tenbîh olunduğu bi’l-iltimâs huzûr-ı âlîlerine i‘lâm olundu. Fî7 min-M sene 1206