Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 548 Hüküm no: 845 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Tanaş’ın Fatma Hanım’a olan kira borcunu ödemesi Ma‘rûz; Mahmiye-i İslâmbol hısnı ebvâbından Balatkapısı dâhilinde Kürkcüçeşmesi mahallesinde sâkine ve zâtı mu‘arrefe Fatıma bt. İsmail nâm hatun medîne-i Üsküdar’da mahfil-i bâbda meclis-i şer‘-i hatîrde zikri âtî bağçede müsâneheten müsteciri Bağçevân Yamandi v. Tanaş nâm zimmî muvâcehesinde medîne-i mezbûreye tâbi‘ Kādı karyesi civârında vâki‘ Yemişcibaşı Bağçesi demekle meşhûr ma‘lûmü’l-hudûd bir kıt‘a bağçe kız karındaşım gāibetü ani’l-meclis Âişe Hatun ile münâsafeten yedimizde mülkümüz iken bin iki yüz iki senesi Muharrem’inin üçüncü günü kız karındaşım gāibe-i mezbûre ile mâ‘an senevî iki yüz on beş guruş ücret kavliyle merkūm Yamandi zimmîye îcâr ve teslîm ol dahi istîcâr ve kabûl ve işbu târih-i i‘lâma gelince dört sene zabt ü tasarruf ve sinîn-i mezkûrede bağçe-i mezkûre icâresinden benim nısf hisseme isâbet eden dört yüz otuz guruş hakkımın ancak altmış guruşunu yedinden ahz ü istifâ ve üç yüz yetmiş guruşu zimmetinde bâkī kalmağla taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm üç yüz yetmiş guruşu müdde‘iye-i mezbûre Fatıma Hatun’a edâ ve teslîme müstecir-i merkūm Yamandi zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 15 min-M sene 1206