Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 549 Hüküm no: 846 Orijinal metin no: [69a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’ın Seyyid Mustafa ve Ali’nin İbrahim Beşe’ye olan borçlarını ödedikleri Ma‘rûz; Vilâyet-i Anadolu’da Boyabad kazâsında sâkin İbrahim Beşe b. Abdullah tarafından vekîl olduğu Mustafa b. İbrahim ve es-Seyyid Mehmed b. Mehmed nâm kimesneler şehâdetleriyle sâbit olan müvekkil-i mezbûrun dâmâdı Mehmed b. Mustafa nâm kimesne medîne-i Üsküdar’da mahfil-i bâbda meclis-i şer‘-i hatîrde es-Seyyid Abdullah b. Mehmed ve es-Seyyid Mustafa b. Mehmed ve Ali b. Halil nâm kimesneler mahzarlarında târih-i i‘lâmdan altı sene mukaddem müvekkilim mezbûr İbrahim Beşe yedinden istikrâz ve kabz ve umûrlarına sarfla istihlâk eyledikleri mezbûr es-Seyyid Abdullah otuz guruş ve mezbûr es-Seyyid Mustafa yirmi guruş ve mezbûr Ali otuz bir guruş ki cem‘an seksen bir guruş alacak hakkı mezbûrûn zimmetlerinde hâlâ olmağla bi’l-vekâle taleb ederim deyü da‘vâ ve mezbûrûn cevâblarında fi’l-hakīka müvekkil-i mezbûra meblağ-ı mecmû‘-ı merkūm seksen bir guruş zimmetlerinde deynleri olduğu her biri ikrâr lâkin târih-i i‘lâmdan bir sene mukaddem müvekkil-i mezbûr İbrahim Beşe bizim her birimizi deyn-i mezkûr ile vekîl-i mezbûrun karındaşı gāib ani’l-meclis Sahtiyâncı Bekir nâm kimesne üzerine havâle-i mutlaka ile havâle ve her birimiz havâle-i merkūmeyi kabûl eylemişdik deyü mezbûrûndan her birinin def‘iyle meblağ-ı merkūm otuz guruşun beş buçuk guruşunu dahi mezbûr Bekir Beşe’ye havâle-i merkūmeye binâen edâ etmiş idim deyü medyûn-ı mezbûr es-Seyyid Abdullah’ın eylediği def‘lerini ba‘de’l-inkâr dâfi‘ûn-ı mezbûrûndan her biri eyledikleri def‘lerini adâletleri zâhir olan es-Seyyid Veli b. Hüseyin ve diğer Veli b. Ali nâm kimesneler şehâdetleriyle ber-nehc-i şer‘î vekîl-i mezbûr muvâcehesinde isbât etmeleriyle mûcebiyle müdde‘î-i vekîl-i merkūm müvekkile izâfetle husûs-ı mezkûrda mezbûrûn es-Seyyid Abdullah ve es-Seyyid Mustafa ve Ali’ye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-M sene 1206