Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 550 Hüküm no: 847 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaşma Hasan’ın kendisini yaralayan Molla Yakub ile bedeli karşılığında sulh olduğu Ma‘rûz; Medîne-i Üsküdar hâricinde Tophânelizâde Çeşmesi kurbünde vâki‘ Kürd Yakub’un bağında yanaşma olup ber-vech-i âtî sol kolu tahra ta‘bîr olunur bıçak ile kara bere idiği lede’l-keşf ve’l-mu‘âyene zâhir olan Hasan b. Ahmed medîne-i mezbûrede mahfil-i bâbda meclis-i şer‘-i hatîrde Molla Yakub b. Yusuf muvâcehesinde mezbûr Molla Yakub târih-i i‘lâmdan üç gün mukaddem bağ-ı mezkûr derûnunda bi-gayrı hakkın mezkûr tahra dedikleri bıçak ile sol kolum bâzûsuna darb ve kara bere etmekle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn on altı guruş bedel-i makbûza sulh olup mârrü’z-zikr kara bereye ve mâ-yuhdesü minhe müte‘allika âmme-i de‘âvîden mezbûr Molla Yakub’un zimmetini ibrâ ve ıskāt eyledikde ol dahi bedel-i sulh nâmıyla medfû‘u olan on altı guruşa müte‘allika âmme-i de‘âvîden müdde‘î-i mezbûr Hasan’ın zimmetini ibrâ ve ıskāt ve her biri âharın ber-vech-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 14 min-M sene 1206