Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 550 Hüküm no: 848 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in borcunu ödediği Ma‘rûz; Medîne-i Üsküdar’da Vâlide-i Atik mahallesinde sâkine mu‘arrefetü’z-zât Hadice bt. Halil nâm hatun medîne-i mezbûrede mahfil-i bâbda meclis-i şer‘-i hatîrde kayınatası Ali b. Mehmed mahzarında târih-i i‘lâmdan bir sene mukaddem yedimden istidâne ve kabz ve umûruna sarfla istihlâk eylediği kırk üç guruş zimmetinde hakkım olmağla hâlâ taleb ederim deyü ba‘de’d-da‘vâ ve’l-istintâk mezbûr Ali cevâbında müdde‘iye-i mezbûre meblağ-ı merkūmun yirmi altı guruşunu işbu hâzıratü [bi’l-meclis] zevcem Nefise Hatun yediyle gāibetü ani’l-meclis Kerime nâm hatuna idâne ve teslîm ve meblağ-ı merkūmdan bâkī on yedi guruşunu dahi zevcem mezbûre müdde‘iye-i mezbûrenin emriyle kendi mesârifine sarf etmiş idi deyü eylediği takrîrini müdde‘iye-i mezbûre Hadice hatun huzûr-ı şer‘de tasdîk etmeğin mûcebiyle müdde‘iye-i mezbûre husûs-ı mezkûrda mezbûr Ali’ye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-M sene 1206