Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 551 Hüküm no: 850 Orijinal metin no: [69b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Seyyid Süleyman’ın hizmetini gören Mustafa Beşe’ye olan borcunu ödemesi Ma‘rûz; Medîne-i Üsküdar’da Tenbel el-Hâc Mehmed mahallesinde sâkin sâhib-i arzuhâl Mustafa Beşe b. Mehmed nâm kimesne medîne-i mezbûre mahkemesinde meclis-i şer‘-i hatîrde Hafız es-Seyyid Süleyman Efendi b. İsmail mahzarında mezbûr Hafız es-Seyyid Süleyman Efendi târih-i i‘lâmdan dokuz ay mukaddem yedimden istidâne ve kabz ve umûruna sarfla istihlâk eylediği yüz kırk guruşun on guruşunu yedinden ahz ü kabz, yüz otuz guruşu zimmetinde bâkī kalmağla meblağ-ı bâkī-i merkūm yüz otuz guruş ile ben ücret ile hizmet eder makūlesinden olmamla mezbûr Hafız es-Seyyid Süleyman Efendi’nin talebiyle taht-ı icâresinde olan hân ve kahve dükkânında ücret kavlinsiz dokuz ay hizmet etmemle şühûr-ı mezkûrede müstehak olduğum hizmetimin ecr-i mislini mezbûr Hafız es-Seyyid Süleyman Efendi’den taleb ederim deyü da‘vâ ve mezbûr Hafız Süleyman Efendi cevâbında cihet-i mezkûreden bâkī yüz otuz guruş deyni olduğunu ba‘de’l-ikrâr müdde‘î-i mezbûr Mustafa eylediği ecr-i misl da‘vâsından bâ-tavassut-ı muslihîn yetmiş guruşa sulh olup ziyâde ecr-i misline müte‘allika âmme-i de‘âvîden mezbûr Hafız es-Seyyid Süleyman Efendi’nin zimmetini ba‘de’l-ibrâ ve’l-kabûl mûcebiyle deyn-i meblağ-ı bâkī-i merkūm yüz otuz guruşla bedel-i sulh-ı mezkûr yetmiş guruşu müdde‘î-i mezbûr Mustafa Beşe’ye edâsıyla mezbûr Hafız es-Seyyid Süleyman Efendi’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 8 min-M sene 1206