Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 553 Hüküm no: 852 Orijinal metin no: [69b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hasan’ın kızının izni olmadan Seyyid Mehmed Efendi’ye sattığı bağ için aldığı parayı iade ederek satışın iptal olunması Ma‘rûz; Mahmiye-i İslâmbol’da Kocamustafapaşa mahallesi sükkânından es-Seyyid Mehmed Efendi b. el-Hâc Mehmed medîne-i Üsküdar’da mahfil-i bâbda meclis-i şer‘-i hatîrde İbrahim b. Hüseyin nâm kimesne muvâcehesinde mezbûr İbrahim târih-i i‘lâmdan yedi gün mukaddem medîne-i mezbûre hâricinde İstavros karyesi toprağında kefere mezaristanı kurbünde vâki‘ ma‘lûmü’l-hudûd on dönüm mikdârı bir kıt‘a kürûmu mülk bağı mülkü olmak üzere beş yüz guruş semen tesmiyesiyle bana bey‘ u temlik eyledikde ben dahi iştirâ ve kabûl ve semen-i mezkûrun beş guruşunu yedimden ahz etmiş iken hâlâ semen-i bâkīyi ahz ve bağ-ı mezkûru bana teslîme tenbîh olunmak matlûbumdur deyü da‘vâ ve mezbûr İbrahim cevâbında bağ-ı mezkûr benim mülküm olmayıp işbu hâzıratü bi’l-meclis sulbiye kızım Âişe Hatun’un bâ-hüccet-i şer‘iye şirâen mülkü iken icâzetine mevkūfen ben fuzûlî bey‘ edip ba‘dehû kızım mezbûre vâkıfe oldukda mücîze olmamağla semen nâmıyla bana medfû‘u olan beş guruşu yedimden ahz ve bağ-ı mezkûra müdâhalesi men‘ u def‘ olunmak matlûbumdur deyü eylediği def‘inde dâfi‘-i mezbûr İbrahim’i bi’l-cümle kelimâtında müdde‘î-i mezbûr es-Seyyid Mehmed Efendi ba‘de’t-tasdîk semen nâmıyla medfû‘u olan beş guruşu ahz ü kabz ve bağ-ı mahdûd-ı mezkûra müdâhale etmemek üzere müdde‘î-i mezbûr es-Seyyid Mehmed Efendi’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-M sene 1206