Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 553 Hüküm no: 853 Orijinal metin no: [69b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdullah’ın oğlu Ömer’e olan borcunu ödemesi Ma‘rûz; Medîne-i Üsküdar’da Selami mahallesinde sâkin Ömer b. İbrahim mahfil-i bâbda meclis-i şer‘-i hatîrde babası mezbûr İbrahim b. Abdullah nâm kimesne muvâcehesinde babam mezbûr İbrahim târih-i i‘lâmdan on dört ay mukaddem yedimden bi-tarîki’l-karz istidâne ve kabz eylediği yirmi guruş deyni mukābelesinde eşyâ-i memlûkesinden bir çuka ferâce ve bir entari ve bir don ve bir donluk bez ve bir gömlek ve bir çevre ve iki uçkurunu üvey vâlidem işbu hâzıratü bi’l-meclis Şerife Habibe bt. İbrahim nâm hatun yediyle bana rehin vaz‘ ve teslîm etmiş idi el-hâletü hâzihî eşyâ-i mezkûreyi yedimden ahz birle meblağ-ı merkūm yirmi guruşu bana teslîme babam mezbûr İbrahim’e tenbîh olunmak matlûbumdur deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yirmi guruşu müdde‘î-i mezbûr Ömer’e ba‘de’l-edâ fekk-i rehn etmek üzere babası mezbûr İbrahim şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 12 min-B sene 1205