Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 554 Hüküm no: 855 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saibe Sultan bt. Safa Giray Hân’ın terekesinin vârislerine taksimi esnasında çıkan ihtilafın giderildiği Ma‘rûz; Mahmiye-i İslâmbol’da Kocamustafapaşa Zâviyesi kurbünde sâkine iken bir buçuk sene mukaddem fevt olan Sâibe Sultan bt. Safa Giray Han nâm müteveffiyenin verâseti zevc-i metrûku el-Hâc Ahmed Bey b. Mehmed Bey ile sadriye kebîre kızı Elmas Hanım ve li-ebeveyn kız karındaşı Mübârek Sultan’a isâbeti tahakkukundan [sonra] mezbûr el-Hâc Ahmed Bey kendi nefsinden asâleten, mezbûretân Elmas Hanım ve Mübârek Sultan taraflarından ber-vech-i âtî vekîlleri olduğu İspir v. Melkon nâm zimmînin ikrâr ü i‘tirâfıyla sâbit olmağla vekâleten medîne-i Üsküdar’da meclis-i şer‘-i hatîrde merkūm İspir zimmî muvâcehesinde bin yüz doksan beş senesi hâlâ Mîrü’l-hacc Cezzar Ahmed Paşa mûrisemiz müteveffât-ı mezbûre Saibe Sultan’a ihdâ ve merkūm İspir zimmî yedine alâ-vechi’r-risâle teslîm eylediği bin guruşun sekiz yüz on guruşunu hayatında yedinden ahz ve yüz doksan guruşu merkūm İspir zimmî zimmetinde bâkī kalıp kable’l-ahz ve’l-istifâ fevt olup veresesi mezbûruna mevrûs olmağla asâleten ve vekâleten taleb ederim deyü da‘vâ, merkūm İspir cevâbında ber-vech-i muharrer meblağ-ı merkūm bin guruşu kabz eylediğini ikrâr lâkin vekîl-i mezbûr el-Hâc Ahmed Bey’in mukırr u mu‘terif olduğu sekiz yüz on guruşdan mâ‘adâ müdde‘âsı olan yüz doksan guruşu dahi bi’d-defa‘ât edâ ve teslîm etmiş idim deyü ba‘de’d-def‘ ve’l-inkâr dâfi‘-i merkūm İspir zimmî ber-vech-i muharrer eylediği def‘ini beyân esnâsında bâ-tavassut-ı muslihîn mezbûr el-Hâc Ahmed Bey tasaddî eylediği da‘vâsından merkūm İspir zimmî ile kırk guruş bedel-i makbûza sulh olup ziyâde müdde‘âsına müte‘allika âmme-i de‘âvîden merkūm İspir zimmînin zimmetini ibrâ ve ıskāt edip ol dahi ibrâsını kabûl edip kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 27 min-Z sene 1205