Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 555 Hüküm no: 856 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hüseyin’e küfreden Çoban Tanaş’ın tazir cezası ile cezalandırılması Ma‘rûz; Medîne-i Üsküdar’da Vâlide-i Atik mahallesinde sâkin Mustafa b. Hüseyin medîne-i mezbûrede mahfil-i bâbda meclis-i şer‘-i hatîrde çoban tâifesinden Tanaş v. İstinco nâm zimmî muvâcehesinde merkūm Çoban Tanaş zimmî târih-i i‘lâmdan bir gün mukaddem medîne-i mezbûre hâricinde Tophânelizâde Çeşmesi kurbünde vâki‘ bağım derûnuna üç re’s keçisi[ni] idhâl edip ben dahi men‘ irâdesinde olduğumda merkūm Tanaş zimmî bi-gayrı hakkın dîn ü îmânıma şetm etmekle mûcib-i şer‘îsini hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını udûlden İsmail b. Mustafa ve Ahmed b. Hasan nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle merkūm Tanaş zimmîye şer‘an ta‘zîr lâzım geldiği bi’l-iltimâs huzûr-ı âlîlerine i‘lâm olundu. Fî 17 min-M sene 1206