Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 556 Hüküm no: 858 Orijinal metin no: [70a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Tanaş’ı döven Mustafa b. Hüseyin’in tazir cezası ile cezalandırılması Ma‘rûz; Medîne-i Üsküdar Kasabbaşısı hizmetkârı Çoban tâifesinden Tanaş v. İstanco zimmî medîne-i mezbûrede mahfil-i bâbda meclis-i şer‘-i hatîrde Mustafa b. Hüseyin mahzarında mezbûr Mustafa târih-i i‘lâmdan bir gün mukaddem medîne-i mezbûre hâricinde Tophânelizâde Çeşmesi kurbünde vâki‘ mezbûr Mustafa’nın bağına çobanı olduğum hayvanâtdan üç re’s keçi girip ben dahi men‘ irâdesinde olmamla beni bağında bi-gayrı hakkın kebîr asâ ile zahrıma ve batnıma ve sâir a‘zâma darb edip bi’l-cümle vücûdumu kara bere etmekle mûcib-i şer‘îsini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Tanaş ber-vech-i muharrer müdde‘âsını Memiş b. Mehmed ve İbrahim b. el-Hâc Ahmed nâm kimesneler şehâdetleriyle lede’t-ta‘dîl ve’t-tezkiye muvâcehesinde isbât etmeğin mûcebiyle mezbûr Mustafa’ya şer‘an ta‘zîr lâzım geldiği bi’l-iltimâs huzûr-ı âlîlerine i‘lâm olundu. Fî 17 min-M sene 1206