Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 556 Hüküm no: 859 Orijinal metin no: [70a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Ahmed’in Bostancı İbrahim’e olan borcunu ödemesi Ma‘rûz; Mahrûse-i Galata muzâfâtından kasaba-i Beşiktaş’da sâkin Bostanî İbrahim b. Ömer nâm kimesne medîne-i Üsküdar’da mahfil-i bâbda meclis-i şer‘-i hatîrde Sipâhî Ahmed b. İbrahim mahzarında mezbûr Sipâhî Ahmed vilâyet-i Anadolu’da Niğde kazâsına tâbi‘ Doru? nâm karyede bâ-berât-ı âlî-şân mutasarrıf olduğu tımarını bin iki yüz beş senesi Mart’ı ibtidâsından Şubat’ı gāyetine gelince bir sene-i kâmilede hâsıla olan mahsûlâtını iki yüz guruş bedel-i makbûz mukābelesinde bana ilzâm ben dahi iltizâm ve kabûl ve ta‘şîr içün tarafımdan Mahmud ve el-Hâc Abdi nâm kimesneleri tevkîl ve irsâl etmiş iken tekrar mezbûr Sipâhî Ahmed tımar-ı mezkûru karye-i mezbûre ahâlisinden gāib ani’l-meclis el-Hâc Fazlı nâm kimesneye iki yüz elli guruşa ilzâm ve hâlâ gāib-i mezbûr tarafından ta‘şîr ve zabt olunup benim irsâl eylediğim mezbûrân Mahmud ve el-Hâc Abdi’yi ber-vech-i muharrer ta‘şîrden men‘ etmekle bedel nâmıyla medfû‘um olan meblağ-ı merkūm iki yüz guruşu hâlâ istirdâd ederim deyü da‘vâ ol dahi cevâbında fi’l-hakīka tımar-ı mezkûr iki yüz guruşa müdde‘î-i mezbûra ilzâmını ikrâr lâkin tekrar gāib-i mezbûra dahi ilzâmını ve hâlen ta‘şîrini inkâr etmekle müdde‘î-i merkūm ber-vech-i muharrer müdde‘âsını karye-i mezbûre ahâlisinden Ömer b. Mustafa ve Hüseyin Ağa b. Habib nâm kimesneler şehâdetleriyle ber-nehc-i şer‘î mezbûr Sipâhî Ahmed muvâcehesinde isbât etmeğin mûcebiyle meblağ-ı merkūm iki yüz guruşu müdde‘î-i merkūma redd ü teslîme mezbûr Sipâhî Ahmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 12 min-M sene 1206