Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 557 Hüküm no: 860 Orijinal metin no: [70a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Emrullah’ın yedinde bulunan beygirin sahibi Mehmed b. İsmail’e iadesi Ma‘rûz; Vilâyet-i Anadolu’da Bor kazâsı ahâlisinden olup medîne-i Üsküdar’da misâfiren sâkin Mehmed b. İsmail nâm kimesne medîne-i mezbûrede mahfil-i bâbda meclis-i şer‘-i hatîrde zikri âtî münâza‘un-fîh bârgire vâzı‘ü’l-yed olan es-Seyyid Emrullah b. Ahmed mahzarında târih-i i‘lâmdan dört ay mukaddem işbu meclis-i şer‘de mu‘âyene olunan emlâkimden on guruş kıymetli bir re’s kula bârgirim kazâ-i mezbûrda karındaşım gāib ani’l-meclis Mustafa nâm kimesne yedinde olduğu hâlde zâyi‘ olup hâlâ mezbûr es-Seyyid Emrullah yedinde bulmamla bi’l-istihkāk [taleb] ederim deyü da‘vâ, ol dahi cevâbında kazâ-i mezbûr a‘yânı ( ) nâm kimesne bârgir-i mezbûru bana bir buçuk ay mukaddem hibe ve teslîm etmiş idi deyü ba‘de’l-inkâr müdde‘î-i mezbûr ber-vech-i muharrer müdde‘âsını Ahmed b. Ömer ve diğer Ahmed b. Abdullah nâm kimesneler şehâdetleriyle vech-i şer‘î üzere muvâcehesinde ba‘de’l-isbât ve gıbbe’t-tahlîf mûcebiyle zikr olunan bârgiri müdde‘î-i mezbûra teslîme mezbûr es-Seyyid Emrullah’a tenbîh olunduğu bi’l-iltimâs huzûr-ı âlîlerine i‘lâm olundu. Fî 10 min-M sene 1206