Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 557 Hüküm no: 861 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hanım’ın bulunduğu mahalleden çıkarılması Ma‘rûz; Medîne-i Üsküdar’da Turbali mahallesi sükkânından İmâm Süleyman Efendi b. Abdullah ve Müezzin Hafız Mehmed b. İbrahim ve ahâli-i mahalleden Çorbacı Veli Ağa b. Mahmud ve Osman Ağa b. Ömer ve es-Seyyid Ömer Efendi b. Ali ve el-Hâc Mehmed Tâhir Efendi b. Osman ve Ali b. Mehmed ve Mehmed Emin b. Mustafa ve Kasab Mehmed b. Ali ve İsmail Ağa b. Abdurrahman ve Ali b. Osman ve Mehmed b. Hüseyin ve es-Seyyid Mehmed Tâhir Efendi b. es-Seyyid Mehmed nâm kimesneler bi-ecma‘ihim meclis-i şer‘-i hatîrde yine mahalle-i mezbûrede sâkine ve zâtı mu‘arrefe Zeyneb bt. Ahmed nâm hatun mahzarında mezbûre Zeyneb Hatun kendi hâlinde olmayıp ve bundan akdem nâ-mahremden adem-i ictinâbı ve mechûlü’l-ahvâl kimesneleri menziline getirip hilâf-ı şer‘-i şerîf evzâ‘ u etvârına binâen menzilinde icrâ-yı fısk üzere olmayıp [olup] lede’l-ihbâr iki def‘a bâ-i‘lâm mahalle-i mezbûreden ihrâc olunup mazarratından cümlemiz halâs olmuş iken yine bir takrîb menziline duhûl ve ikāmet ve ber-vech-i muharrer icrâ-yı müfside-i beşî‘aya mübâderetinden mâ‘adâ her birimize ale’l-infirâd şütûm-ı galîza ile şetm ve ırzımızı hetk ve ef‘âl-i sâbıkāsında ısrâr ve emn [ü] rahatımız meslûb olmuşdur deyü mezbûr Zeyneb’in sû-i hâlini muvâcehesinde ihbâr ve fî-mâ ba‘d menzil-i mezkûrda aslâ ikāmet etmemek üzere mahalle-i mezbûreden ihrâc ve mazarratından halâs olunmak bâbında fermân-ı âlîleri sudûrunu ahâli-i mezbûreden her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 17 min-M sene 1206