Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 559 Hüküm no: 864 Orijinal metin no: [70b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyinli köyü civarındaki Çavuşlu Çiftliği merasının kiralanması Ma‘rûz; Medîne-i Üsküdar’a muzâfe Yoros nâhiyesine tâbi‘ Hüseyinli karyesi ahâlileri taraflarından ber-vech-i âtî münâza‘un-fîh mer‘ada intifâ‘ları mütehakkık olan mahsûrü’l-esâmî kimesnelerin vekîl-i müseccelleri ve karye-i mezbûre ahâlisinden ashâb-ı arzuhâl Süleyman b. Halil ve Mehmed b. Mustafa ve Halil b. İbrahim ve es-Seyyid Emrullah b. Abdi nâm kimesneler meclis-i şer‘-i hatîrde asâleten ve vekâleten karye-i mezbûre kurbünde Çavuşlu Çiftliği demekle meşhûr çiftlikde müstecirler olan Dimitri v. Ziko ve İsteryani v. Zelyo nâm zimmîler muvâcehelerinde karye-i mezbûre civârında vâki‘ ez-kadîm mer‘amız olan arazimizi târih-i kitâbdan yirmi altı sene mukaddem hâlik olan merkūm Zelyo zimmîye senevî ellişer guruşa bâ-ma‘rifet-i sâhib-i arz îcâr ve teslîm ve on sekiz sene hayvanâtını ra‘y ve mutasarrıf iken hâlik oldukda ücret-i merkūme-i müsemmâmızı kable’l-ahz ve’l-istifâ arâzi-i mahdûd-ı mu‘ayyenemizde müstecirân-ı merkūmân yine fuzûlî hayvanâtlarını ra‘y etmekle hâlik-i merkūmun on sekiz senelik ellişer guruşdan dokuz yüz guruş ücret-i müsemmâmızı taleb ederiz deyü da‘vâ ve merkūmân cevâblarında ancak biz mer‘a-yı merkūmu üç sene ücret-i mezkûre ile istîcâr ve tasarruf ba‘dehû fesh-i îcâr etmiş idik deyü hâlik-i merkūmun istîcâr ve tasarrufunu inkâr ve beynlerinde ba‘de vukū‘ı’l-münâza‘a bâ-tavassut-ı muslihîn ahâli-i mezbûre eyledikleri da‘vâlarından meccânen fâriğler olup ve mer‘a-yı mezkûru târih-i i‘lâm senesi rûz-ı Kasım’ından beher sene ellişer guruş ücret ile ba-ma‘rifet-i sâhib-i arz merkūmân Dimitri ve İsteryani zimmîlere asâleten ve vekâleten hayvanâtlarını ra‘y etmek üzere îcâr eylediklerinde onlar dahi ber-minvâl-i muharrer istîcâr ve kabûl ve beher sene tesmiye olunan ücret-i mezkûreyi ahâli-i mezbûreye edâ ve teslîme merkūmân Dimitri ve İsteryani’den her biri ba‘de’t-ta‘ahhüd ve ahâli-i karye-i merkūmûn dahi eğer vekîlleri olduğumuz sâir ahâli-i karye eğer bizim bu îcâr ve istîcârımızı kabûl etmeyip müstecirân-ı merkūmândan bir nesne ahz eder ise bizler mikdâr-ı me’hûzlarına kefîl ve dâminleriz deyü ta‘ahhüd birle kat‘-ı münâza‘a eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 11 min-M sene 1206