Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 560 Hüküm no: 865 Orijinal metin no: [70b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Feyzullah’ın Lazori v. Todori’den alacaklı olduğu yolundaki iddiasına itibar edilmediği Ma‘rûz; Vilâyet-i Anadolu’da Develi kazâsı ahâlisinden olup medîne-i Üsküdar’da misâfiren sâkin Ömer b. Feyzullah medîne-i mezbûrede mahfil-i bâbda meclis-i şer‘-i hatîrde yağcı tâifesinden Lazari v. Todori nâm zimmî muvâcehesinde târih-i i‘lâmdan yirmi sene mukaddem fevt olan üvey babam Mehmed b. Abdullah’ın terekesini kazâ-i mezbûre hâkimi tahrîr ve bundan akdem hâlik olan merkūm Lazari zimmînin babası merkūm Todori zimmetinde defter-i kassâmda altmış guruş deyn tahrîr edip ba‘dehû meblağ-ı merkūm anam gāibetü ani’l-beled Meryem bt. Halil müteveffâ-yı mezbûrun zevce-i metrûkesi olup meblağ-ı merkūmu anam mezbûrenin mehir ve hissesi içün ta‘yîn olunmağla anam mezbûre Meryem içün altmış guruşu bana edâ eylesin gâh mukaddemâ altmış guruşu otuz guruşa sulh olmağla otuz guruşu versin deyü tasaddî eylediği da‘vâsını tashîh edemediğinden mâ‘adâ kable-sübûti’l-vekâle meblağ-ı merkūmu Lazari zimmîden taleb ve da‘vâsında şâibe-i tezvîr fehmolunup mezbûr Ömer bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-M sene 1206