Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 439 Hüküm no: 465 Orijinal metin no: [105a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan’ın üzerine dava açtığı Nehabet v. Kabril’in zimmetini daha önceden ibra ettiği Ma‘rûz. Sâhib-i arzuhâl Aleksan zimmî meclis-i şer‘de Vezir Hanı’nda sâkin sarraf tâifesinden Nehabet v. Gabril nâm Ermeni muvâcehesinde iki buçuk sene mukaddem mezbûr sarrafdan dokuz yüz guruş ahz u kabz ve istihlâk edip meblağ-ı mezbûr zimmetimde mezbûr sarrafa deynim olmağla meblağ-ı mezbûru bi’d-defa‘ât kendiye edâ ve teslîm eylediğimden sonra bir buçuk sene mukaddem beni Çavuş menzilinde habs ve bi-gayr-ı hakkın altmış yedi guruşumu ziyâde ahz u kabz etmekle ziyâde-i mezkûreyi taleb ederim deyü da‘vâ eyledikde mezbûr sarraf cevâbında müdde‘î-i mezbûr Aleksan zimmetinde [105b] ber-vech-i muharrer hakkım olan dokuz yüz guruşun iki yüz otuz guruşunu mukaddemâ ve altı yüz yetmiş guruşunu bir buçuk sene mukaddem cem‘an dokuz yüz guruşu bana edâ ve teslîm ben dahi yedinden ahz u kabz eylediğimden sonra mezbûr Aleksan husûs-ı mezkûra müte‘allika âmme-i da‘vâdan hân-ı mezkûrda şuhûd mahzarında zimmetimi ibrâ ve iskāt etmişidi deyü def‘ ve def‘-i mezkûrunu şuhûd-ı udûlden hân-ı mezkûr erbâbından el-Hâc İsmail b. Mehmed ve Abdullah Çelebi b. İsmail nâm kimesneler ve Sarraf Kirkor v. Artin ve Cudalı Bedros v. Asvador ile vech-i şer‘î üzere muvâcehesinde isbât etmeğin mûcebince mezbûr Aleksan bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 28 Safer sene [1]143.