Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 560 Hüküm no: 866 Orijinal metin no: [70b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Seyyid Süleyman Efendi’nin borcunu ödemesi Ma‘rûz; Medîne-i Üsküdar’da Vâlide-i Atik mahallesinde sâkin Neccâr Ali Halîfe b. İsmail medîne-i mezbûrede meclis-i şer‘-i hatîrde Hoca Hafız es-Seyyid Süleyman Efendi b. İbrahim mahzarında târih-i i‘lâmdan bir sene mukaddem ben ve sâir neccâr neferâtıyla mezbûr Hafız es-Seyyid Süleyman Efendi’nin medîne-i mezbûrede Tenbel el-Hâc Mehmed mahallesinde vâki‘ taht-ı icâresinde olan ma‘lûmü’l-hudûd ve’l-müştemilât hanını atik enkāzından mâ‘adâ emriyle iktizâ eden cedîd kereste ile levâzımını ben kendi mâlımdan sarf etmek üzere mukāvele ve müceddeden binâ ve inşâ ve ba‘de’t-tekmîl beynimizde hesâbımızı sahîhan rü’yet eylediğimizde gerek ücret ve gerek sâir masrûfâtımdan müctemi‘a olan bâ-temessük altı yüz doksan yedi guruş hakkımın altı yüz elli guruşunu yedinden ahz ü kabz ve kırk yedi guruşu bâkī zimmetinde kalmağla taleb ederim deyü da‘vâ ol dahi cevâbında fi’l-hakīka müdde‘î-i mezbûr Neccâr Ali Halîfe’ye cihet-i mezkûreden bâkī kırk yedi guruş deyni olduğunu ikrâr lâkin hîn-i hesâbda mezbûr Ali Halîfe hân-ı mezkûrun dört odasına birer ocak dahi inşâ etmek üzere mukāvele ve ol-vechile hesâbımız rü’yet olunmuş idi deyü eylediği def‘ini beyân ve isbâta kādir olamayıp talebiyle mezbûr Neccâr Ali Halîfe gıbbe’t-tahlîfi’ş-şer‘î mûcebiyle meblağ-ı bâkī-i merkūm kırk yedi guruşu müdde‘î-i mezbûra edâ ve teslîme mezbûr Hafız es-Seyyid Süleyman Efendi’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 9 min-M sene 1206