Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 561 Hüküm no: 867 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mustafa ile Hasan b. Hüseyin’in alacak verecek davasında sulh oldukları Ma‘rûz; Medîne-i Üsküdar’da Mehmedpaşa mahallesinde sâkin sâhib-i arzuhâl es-Seyyid Ahmed b. Mustafa mahfil-i bâbda meclis-i şer‘-i hatîrde derûn-ı arzuhâlde mezkûrü’l-ism Hasan b. el-Hâc Hüseyin mahzarında mezbûr Hasan’ın sermâyesiyle târih-i i‘lâmdan üç buçuk ay mukaddem emriyle beş def‘a Tekfurdağı’nda mübâya‘a eylediğim sefîne-i müstecire ile soğan ve karpuz ve dakīk ve sâir zehâir içün yüz elli guruş masrûfâtım olmağla meblağ-ı merkūm yüz elli guruş ile şühûr-ı mezkûrede müstehak olduğum ecr-i mislimi taleb ederim deyü eylediğim da‘vâ-yı mezkûremden ben bâ-tavassut-ı muslihîn otuz sekiz guruş bedel-i makbûz mukābelesinde mezbûr Hasan ile sulh olup gerek masrûfâtıma ve gerek sefâin navlununa ve gerek ecr-i mislime ve târih-i kitâba gelince beynimizde cereyân eden cemî‘ ahz ü i‘tâ ve mu‘âmelât-ı şettâya müte‘allika âmme-i de‘âvîden mezbûr Hasan’ın zimmetini ibrâ ve ıskāt eylediğimde ol dahi bana medfû‘u olan otuz sekiz guruşa ve bâ-i‘lâm mahkûmün-bih zimmetinde mezbûr Hasan’a deynim olan altmış üç guruşdan mâ‘adâ âmme-i de‘âvîden benim zimmetimi ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü takrîrini mezbûr Hasan tasdîk edip bu vechile kat‘-ı münâza‘a eyledikleri mübâşiri iltimâsıyla huzûr-ı âlîlerine i‘lâm olundu. Fî 29 min-Muharrem sene 1206