Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 561 Hüküm no: 868 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraf Agob’un evine akıtılan iki adet vakıf çeşmeye ait fazla suların kirasının ödenerek kullanılmasına engel çıkarılmaması Ma‘rûz; Medîne-i Üsküdar’da Selami mahallesinde mütemekkin arzuhâl eden Sarrâf Agob v. Margos nâm zimmî medîne-i mezbûrede mahfil-i bâbda meclis-i şer‘-i hatîrde Rahip Agob nâm hâlikin mahalle-i mezbûrede vâki‘ iki aded mâ-i cârî çeşmeleri vakfının mütevellîsi olan arzuhâlde ismi mezkûr Sarrâf Agasi v. Artin nâm zimmî muvâcehesinde bundan akdem vakf-ı mezbûrun mütevellîsi olan mütevellî-i merkūmun babası Artin nâm zimmî zikr olunan iki aded çeşmeye cârî olan vakıf mâ-i lezîzin fazlasını telef ve izâ‘atden ihtirâzına binâen yüz guruş icâre-i mu‘accele ve yevmî bir akçe icâre-i müeccele ile bâ-temessük bana bi’t-tevliye îcâr, ben dahi istîcâr ve kabûl ve fazla-i mâ-i mezkûru yirmi seneden mütecâviz hâlik-i merkūmun ve hâlâ mütevellî oğlu merkūmun izin ve icâzetleriyle menzilime icrâ etmiş iken hâlâ mütevellî olan Agasi nâm zimmî benim ber-vech-i muharrer tasarruf ve intifâ‘ıma fuzûlî bi-gayrı hakkın mümâna‘at eder suâl olunup adem-i mümâna‘atına tenbîh olunmak matlûbumdur dedikde gıbbe’s-suâl mütevellî-i merkūm dahi nef‘an-li’l-vakf gerek babası hâlikin ve gerek kendinin ber-vech-i muharrer bi’t-tevliye îcârlarını ikrâr ü i‘tirâf etmeğin mûcebiyle merkūm Sarrâf Agob beher sene ta‘yîn olunan icâre-i müeccelesini taraf-ı vakfa edâ eyledikce mâ-i lezîz-i mezkûrun ke’l-evvel merkūm Agob’un menziline cereyân eylemesine mümâna‘at etmemek üzere mütevellî-i merkūm Agasi zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 20 min-M sene 1206