Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 567 Hüküm no: 878 Orijinal metin no: [71b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan b. Ahmed Efendi’nin vakfettiği mektep binasının bitişiğindeki dükkânların mektep müştemilâtından olmadığı Ma‘rûz; Medîne-i Üsküdar’da Kādıasker mahallesinde vâki‘ merhûm Ramazan [b.] Ahmed Efendi nâm sâhibü’l-hayrın ma‘lûmü’l-hudûd bir bâb mektebinde berât-ı âlî-şân ile hoca olan Hafız Ahmed Efendi b. Ahmed nâm kimesne meclis-i şer‘-i hatîrde Mehmed Emin b. Mehmed nâm kimesne mahzarında vakf-ı mezbûrun hâlâ mütevellîsi es-Seyyid Ali hâzır olduğu hâlde zikr olunan mekteb ittisâlinde vakf-ı mezbûrdan iki bâb dekâkin Habibe bt. Mustafa nâm hatunun bi’l-icâreteyn taht-ı tasarrufunda iken vefât eyledikde sadrî oğlu hâzır bi’l-meclis es-Seyyid Ali b. Mustafa’ya intikāl ol dahi dekâkin-i mezkûreyi bâ-re’y-i mütevellî işbu mezbûr Mehmed Emin’e ferâğ ve tefvîz edip lâkin dekâkin-i mezkûre fevkınde mekteb-i mezkûra muttasıl bir bâb odada mukaddemâ mekteb hocaları sâkin olup mekteb-i mezkûr müştemilâtından iken mezbûr Mehmed Emin dekâkin-i mezkûre müştemilâtındandır deyü bi-gayrı hakkın vaz‘-ı yed eder suâl olunup zikr olunan odadan kasr-ı yed ve mekteb-i mezkûr içün terk olunmak matlûbumdur deyü da‘vâ ve mezbûr Mehmed Emin cevâbında fi’l-hakīka dekâkin-i mezkûreye [mezkûre] fevkınde olan odaya vaz‘-ı yedini ikrâr lâkin zikr olunan oda dekâkin-i mezkûre müştemilâtından olup ez-kadîm dekâkin-i mezkûre mutasarrıfları taraflarından zabt ve tasarruf olunagelmişdir deyü eylediği def‘ini mahalle-i mezbûre imâmı Hafız Mehmed Efendi b. el-Hâc Osman ve Müezzin Molla Ahmed b. Osman ve ahâli-i mahalleden Zeynelabidin b. Ahmed ve Mustafa Ağa b. Ahmed ve Mehmed Beşe b. Mustafa ve Hüseyin b. Hasan ve Salih b. Abdullah nâm kimesneler meclis-i şer‘de alâ-tarîki’ş-şehâde haber vermeğin mûcebiyle müdde‘î-i mezbûr Hoca Hafız Ahmed Efendi da‘vâ-yı mezkûresiyle mezbûr Mehmed Emin’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Safer sene 1206