Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 568 Hüküm no: 881 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hanım’ın boşandığı kocasından alacakların tahsil ettiği, fazladan eşya talebinde bulunmasının geçersiz olduğu Ma‘rûz; Medîne-i Üsküdar’a tâbi‘ Bulgurlu karyesinde sâkine mu‘arrefetü’z-zât Nefise bt. Mahmud nâm hatun medîne-i mezbûrede mahfil-i bâbda meclis-i şer‘-i hatîrde sevc-i sâbıkı es-Seyyid eş-Şeyh Mehmed Şemsi Efendi b. eş-Şeyh Mehmed Fazlı Efendi mahzarında ben mezbûr es-Seyyid eş-Şeyh Mehmed Şemsi Efendi’nin yetmiş beş guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan on iki gün mukaddem beni tatlîk edip zimmetinde mütekarrir ve ma‘kūdun-aleyh olan mârrü’z-zikr yetmiş beş guruş mehrimi bana def‘ ü teslîm eyledikde ben dahi yedinden tamamen ahz ü kabz eylediğimden sonra zevc-i sâbıkım mezbûrun emlâkinden olup yedimde mevcûd olan mecmû‘-ı kıymetleri yirmi guruşa bâliğ bir nişân yağlığı ve bir çevre ve bir nişân bohçası ve bir basma seccâde ve iki hilâlî gömlek ve bir donunu nafaka-i iddet-i ma‘lûmem ve meûnet-i süknâm içün bi’t-terâzî ta‘yîn olunan yirmi guruş hakkıma zevc-i sâbıkım mezbûr takas eyledikde ben dahi mukāssa ve kabûl etdikden sonra mezbûr es-Seyyid eş-Şeyh Mehmed Şemsi Efendi ile zevciyet beynimizde kāime iken zevc-i sâbıkım mezbûrun hâletesi gāibetü ani’l-meclis Rukiye nâm hatunun emriyle zevc-i sâbıkım mezbûrun ebeveynine irsâl eylediğim mecmû‘-ı kıymetleri kırk guruşa bâliğ iki hilâlî gömlek ve iki uçkur ve iki don ve bir yağlık ve bir çevre ve bir makrama ve iki dikme bohçamı zevc-i sâbıkım mezbûr es-Seyyid eş-Şeyh Mehmed Şemsi Efendi’den taleb ederim deyü müdde‘iye-i mezbûre Nefise Hatun’un ber-vech-i muharrer tasaddî eylediği da‘vâsından mezbûr es-Seyyid eş-Şeyh Mehmed Şemsi Efendi’ye suâl dahi teveccüh etmediği bi’l-iltimâs huzûr-ı âlîlerine i‘lâm olundu. Fî 27 min-M sene 1206