Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 572 Hüküm no: 887 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın boşandığı kocası ile nafaka ve mehir konularında anlaşmaya vardığı Ma‘rûz; Medîne-i Üsküdar’da Solaksinan mahallesinde sâkine mu‘arrefetü’z-zât Âişe bt. Osman nâm hatun mahfil-i bâbda meclis-i şer‘-i hatîrde zevc-i sâbıkı Mustafa b. Mehmed mahzarında mezbûr Mustafa’nın otuz guruş mehr-i müeccel tesmiyesiyle zevce-i medhûlün-bihâsı iken târih-i i‘lâm günü beni tatlîk etmekle mezbûrun zimmetinde mütekarrir ve ma‘kūdun-aleyh olan mârrü’z-zikr otuz guruş mehr-i müeccelim ile nafaka-i iddet-i ma‘lûmem ve meûnet-i süknâm içün dahi bi’t-terâzî takdîr olunan beş guruş ki cem‘an otuz beş guruşu taleb ederim deyü eylediği da‘vâsından bâ-tavassut-ı muslihîn yirmi guruş bedel-i makbûza mezbûr Mustafa ile sulh olup ziyâde müdde‘âsına ve hukūk-ı zevciyete ve sâire müte‘allika âmme-i de‘âvîden mezbûr Mustafa’nın zimmetini ibrâ ve ıskāt ol dahi kezâlik hukūk-ı zevciyete ve sâire müte‘allika âmme-i de‘âvîden müdde‘iye-i mezbûrenin zimmetini ibrâ ve ıskāt ve her biri âharın ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 18 min-M sene 1206