Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 573 Hüküm no: 890 Orijinal metin no: [72b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemici esnafından Bogos v. Mikail’in nizama aykırı davranışlarda bulunduğu Ma‘rûz; Medîne-i Üsküdar’da gemici esnâfının kethudâları Ömer b. Ali ve yiğitbaşıları Mustafa b. İbrahim ve ustalarından es-Seyyid Mehmed b. Mustafa ve Ali b. Ahmed ve es-Seyyid Mehmed Emin b. Mustafa ve Mehmed b. Salih b. Mehmed ve Ömer b. İbrahim ve Mehmed Ali b. el-Hâc Mehmed ve es-Seyyid Ali b. Abdurrahman nâm kimesneler ile zimmî ustalarından Serkiz v. Karabet ve Arakil v. Kirkor ve Bogos v. Serkiz ve Kirkor v. Kazer ve Bogos v. Gaspar ve Kirkor v. Sahak ve Karabet v. Sahak ve İstefan v. Sahak nâm zimmîler bi-ecma‘ihim meclis-i şer‘-i hatîrde yine esnâf-ı mezkûreden Bogos v. Mikâil nâm zimmî muvâcehesinde merkūm Bogos dâimâ bizlere mümâna‘at ve muhâlefet üzere olup gerek umûr-ı mühimme ve gerek beynimizde imdâd-ı seferiye içün verilen nizâmımıza bir vechile itâ‘at etmeyip nizâm-ı kadîmimizin ihtilâline bâdî ve üzerimize tahmîl ve tanzîmi lâzım olan umûrun ta‘dîline bâ‘is olur harekâtdan bir türlü ictinâb etmeyip bi’d-defa‘ât kendiye tenbîh ve nush ü pend eylediğimizde mütenassıh olmayıp ef‘âl-i sâbıkāsında ısrâr ve merkūmdan emn ü rahatımız meslûb olmuşdur deyü hilâf-ı rızâ ve mugāyir-i nizâm-ı kadîm hareketini muvâcehesinde ihbâr ve fî-mâ ba‘d esnâf-ı mezkûreden ihrâc buyurulmak bâbında fermân-ı âlîleri sudûrunu her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 12 min-Safer sene 1206