Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 577 Hüküm no: 899 Orijinal metin no: [73a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in misafiri olduğu Mehmed Emin’in evinde kaybolan altınları hakkında açtığı davaya itibar edilmediği Ma‘rûz; Vilâyet-i Anadolu’da Kütahya sancağında Gedizli kazâsı ahâlisinden olup hâlâ medîne-i Üsküdar’da misâfiren sâkin Mehmed b. Hüseyin nâm kimesne medîne-i mezbûrede meclis-i şer‘-i hatîrde Mehmed Emin b. el-Hâc Halil nâm kimesne mahzarında târih-i i‘lâmdan beş gece mukaddem medîne-i mezbûrede Sinanpaşa mahallesinde vâki‘ mezbûr Mehmed Emin’in menzilinde misâfereten gece sâkin olduğum odasında ya[ta]r iken entarinin cebinde muşamma‘ derûnunda mevcûde iki yüz otuz guruş kıymetli kırk aded yaldız altunum zâyi‘ olmuş idi deyü eylediği da‘vâsında sâkin olduğu oda rüfekālarından birine ta‘yîn-i ahz etmeyip mücerred mezbûr Mehmed Emin’in odasında sâkin olduğuma binâen meblağ-ı merkūm iki yüz otuz guruş kıymetli kırk aded yaldız altunumu mezbûr Mehmed Emin’den taleb ederim deyü takrîr-i meşrûhu üzere tasaddî eylediği da‘vâsında mezbûr Mehmed Emin’e suâl dahi teveccüh etmediği bi’l-iltimâs huzûr-ı âlîlerine i‘lâm olundu. Fî 18 min-S sene 1206