Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 578 Hüküm no: 900 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın kızı Naile Hanım’daki alacakları karşılığında kendisiyle birlikte yaşamaya karar verdiği Ma‘rûz; Medîne-i Üsküdar’da Vâlide-i Atik mahallesinde sâkine mu‘arrefetü’z-zât Âişe bt. Mustafa nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe sadriye kebîre kızı Nâile bt. Hasan nâm hatun mahzarında mezbûre Nâile bundan akdem yedimden ve mâlımdan istidâne ve kabz ve umûruna sarfla istihlâk eylediği yetmiş bir guruş ve fuzûlî âhara bey‘ eylediği beş guruş kıymetli bir top keten bezi semeninden dahi beş guruş ki cem‘an yetmiş altı guruş hakkımı taleb ederim deyü eylediği da‘vâsından meccânen fâriğa olup husûs-ı mezkûra müte‘allika âmme-i de‘âvîden kızı mezbûre Nâile’nin zimmetini ibrâ ve ıskāt eyledikde ol dahi ibrâsını ba‘de’l-kabûl fî-mâ ba‘d vâlidesi müdde‘iye-i mezbûreyi âhar oğulları yanında iskân etdirmeyip kendi sâkine olduğu menzilinde infâk ve hizmetini rü’yete ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 23 min-Safer sene 1206