Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 580 Hüküm no: 905 Orijinal metin no: [73b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefere katılmayan Ahmed b. Osman’ın aldığı parayı iade etmesi Ma‘rûz; Mahrûse-i Galata muzâfâtından Tersâne-i âmire’de sâkin donanma-yı hümâyûn kalyoncu neferâtı siyavuşlarından Ali Beşe b. Mustafa medîne-i Üsküdar’da mahfil-i bâbda meclis-i şer‘-i hatîrde Ahmed b. Osman nâm kimesne mahzarında taraf-ı Devlet-i aliyye’den ulûfe nâmıyla bana teslîm olunan mikdâr-ı mu‘ayyenden mezbûr Ahmed’e târih-i i‘lâmdan beş ay mukaddem donanma-yı hümâyûnda bayrağım neferâtından olup benim ile bahren sefer-i hümâyûna gitmek içün ücreti olmak üzere yedine yetmiş beş guruş teslîm eylediğimde ol dahi ahz ü kabz edip kendisi ihfâ ve benim ile gitmeyip yerine gāib ani’l-meclis Osman nâm sagīri irsâl ol dahi edâ-yı hizmet etmeyip firâr etmekle medfû‘um olan meblağ-ı merkūm yetmiş beş guruşu zâbitimiz tevkîliyle hâlâ istirdâd ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yetmiş beş guruşun edâsıyla mezbûr Ahmed ilzâm olunduğu bi’l-iltimâs huzûr-ı âlîlerine i‘lâm olundu. Fî 20 min-Safer sene 1206