Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 584 Hüküm no: 912 Orijinal metin no: [74a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kazer’in beygiri tarafından yaralanan Saliha Hanım’ın diyeti karşılığında açtığı davadan vazgeçtiği Ma‘rûz; Medîne-i Üsküdar’da Hacce Hatun mahallesinde sâkine olup ber-vech-i âtî at dokunmasından kara bere idiği lede’l-keşf ve’l-mu‘âyene zâhir olan mu‘arrefetü’z-zât Saliha bt. Mehmed nâm hatun meclis-i şer‘-i hatîrde Ekmekci Kazer v. Kiragos nâm zimmî tarafından ber-vech-i âtî tasdîka vekîl olan Destgâhdâr Karabet v. Manuk nâm zimmî muvâcehesinde müvekkil-i merkūm Kazer zimmî medîne-i mezbûrede Köprübaşı’nda vâki‘ değirmenin kapısını küşâd eylediğinden nâşi değirmen-i mezkûr derûnunda gayr-ı merbût hergele ta‘bîr olunur bir re’s bârgiri değirmen-i mezkûrun kapısından Sûk-ı Sultâniye’ye hurûc ve ben târih-i i‘lâm günü değirmen-i mezkûrun önünden tarîk-i âmda mürûr eder iken bârgir-i mezkûr üzerime hücûm ve beni yıkıp ve başım ile sağ kolumu ayağı ile çiğneyip kara bere etmekle mûcib-i şer‘îsini müvekkil-i merkūm Kazer zimmîden taleb ederim deyü eylediği da‘vâsından bâ-tavassut-ı muslihîn on guruş bedel-i makbûza sulh olup zikr olunan kara bereye ve mâ-yuhdesü minhe müte‘allika âmme-i de‘âvîden müvekkil-i merkūm Kazer zimmînin zimmetini ıskāt eylediğinde vekîl-i merkūm ber-vech-i muharrer müdde‘iye-i mezbûre Saliha Hatun’un ibrâsını bi’l-vekâle kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fi 29 min-Safer sene 1206