Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 585 Hüküm no: 914 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsusî Mehmed Bey ile Kayserili Bodoş ve Vasil’in kıymetli eşya davasında sulh oldukları Ma‘rûz; Medîne-i Üsküdar’da Atpazarı’nda Suluhan’da misâfiren sâkin asker tâifesinden Tarsusî Mehmed Bey b. Abdullah Bey medîne-i mezbûrede meclis-i şer‘-i hatîrde Kayseriyeli Bodoş v. Abram ve Vasil v. Sanan nâm zimmîler muvâcehelerinde işbu sene-i mübârekede ordu-yı hümâyûnda olan Tarsus sipâhîlerinin ben harçlıkcıları olup Âsitâne’ye gelirken esnâ-i râhda merkūm Bodoş zimmî bana refîk olmağla târih-i i‘lâmdan yirmi gün mukaddem hân-ı mezkûrda mâ‘an sâkin olduğumuz odada heybemi küşâd ve heybe derûnunda ikisi kırmızı ve biri beyaz üç kesede mevcûd altun ve beyaz akçe mahlût iki bin iki yüz yetmiş sekiz guruşumu nakden ve yüz seksen guruş kıymetli altı top kutnî ve üç top çiçekli keremsûdumu hufyeten ahz edip nakd-i merkūmdan adedi nâ-ma‘lûm olarak bir mikdârını merkūm Vasil zimmî[ye] teslîm ol dahi sâkin olduğu medîne-i mezbûrede Karabaş Hanı’nda yüz elli sekiz guruşunu taht-ı cidâra defn ve ihfâ edip merkūmândan taleb eylediğimde merkūm Vasil zimmî meblağ-ı merkūm yüz elli sekiz guruşunu ve merkūm Bodoş zimmî dahi yedinde mevcûd olan üç yüz seksen guruşunu ki cem‘an beş yüz otuz sekiz guruşunu yedlerinden ahz ve bin yedi yüz kırk guruşu yedlerinde bâkī kalmağla meblağ-ı bâkī-i merkūm ile eşyâ-i mezkûreyi taleb ve da‘vâ eylediğimde merkūm Bodoş zimmî cevâbında ber-vech-i muharrer heybem derûnunda üç kesede mevcûd akçemi ahz ve adedi ma‘lûm olmayarak bir mikdârını merkūm Vasil zimmîye ve bir mikdârını mahmiye-i İslâmbol’da mütemekkin babam merkūm Abraham zimmîye teslîm eyledim deyü ikrârından sonra beynimize muslihûn tavassut edip ben da‘vâ-yı mezkûremden merkūm Bodoş zimmî ile mukaddem ahz[ı] olan beş yüz otuz sekiz guruş üzerine yedi yüz guruş verip cem‘an bin iki yüz otuz sekiz guruş bedel-i makbûz mukābelesinde sulh ve bâkī taleb ve da‘vâdan zimmetini ibrâ ve ıskāt eyledim, ol dahi sulh ve ibrâyı kabûl edip bu vechile kat‘-ı münâza‘a eyledik deyü mukırr-ı mezbûr Mehmed Bey’i merkūmân Bodoş ve Vasil zimmîlerden her biri tasdîk eyledikleri ba‘de’t-tescîl bi’l-iltimâs huzûr-ı âlîlerine i‘lâm olundu. Fî 29 min-Safer sene 1206