Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 586 Hüküm no: 915 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Berber Avadik’in terekesinin vârislerine taksiminde çıkan ihtilafın giderilmesi
Ma‘rûz;
Medîne-i Üsküdar’da Yenimahalle’de mütemekkin iken bundan akdem hâlik olan Berber Avadik v. İsodor nâm zimmînin verâseti zevce-i metrûkesi Nazlı bt. Mıgırdıç nâm Nasrâniye ile babası merkūm Asader ve anası Agida bt. Mardıros’a ve sulbiye kızı Serpohi’ye münhasıra ve tashih meselesi yirmi dört sehm i‘tibârıyla üç sehmi zevcesi merkūmeye ve on iki sehmi kızı mezbûreye ve dört sehmi anası merkūmeye ve beş sehmi farzan ve ta‘sîben babası merkūma isabeti tahakkukundan sonra şahsı mu‘arrefe zevce-i mersûme Nazlı Nasrâniye kendi nefsinden asâleten ve sagīre-i merkūmenin bâ-hüccet-i şer‘iye vasîyy-i mansûbesi olmağla vesâyeten medîne-i mezbûrede mahfil-i bâbda meclis-i şer‘-i hatîrde eb-i merkūm İsodor zimmî ile kezâlik şahsı mu‘arrefe ümm-i merkūme Agida Nasrâniye muvâcehelerinde zevcim hâlik-i merkūm Avadik zimmî hayatında ebeveyni merkūmân menzillerinde mütemekkin olup beni yanından tard etmekle helâkinden beş gün mukaddem bir bâb vakıf menzilini yüz elli guruş bedel-i makbûz mukābelesinde âhara ferâgat edip ba‘de’l-helâk bedel-i mezkûru ebeveyni zevcân-ı merkūmân fuzûlî kabz etmekle meblağ-ı merkūm yüz elli guruş ile hâric ez-defter-i kassâm kıymetleri iki yüz guruşa bâliğ ber-mûceb-i defter-i müfredât eşyâsını terekeye idhâl etmeyip ketm ü ihfâ etmekle ber-tashîh-i merkūm sagīre-i merkūme ile bana isâbet eden hisse-i irsiyemizi asâleten ve vesâyeten taleb ederim deyü da‘vâ ve zevcân-ı mezbûrân cevâblarında fi’l-hakīka hâlik-i merkūm menzil-i mezkûru bedel-i merkūm mukābelesinde âhara ferâgat edip ve bedel-i mezkûru kendi yediyle düyûn-ı müteferrikasına vermiş idi deyü ba‘de’l-helâk kabzlarını ve eşyâ-i mezkûreyi inkâr etmeleriyle müdde‘iye-i mezbûre müdde‘âsını beyâna kādire olamayıp talebiyle zevcân-ı merkūmândan her biri gıbbe’t-tahlîfi’ş-şer‘î mûcebiyle müdde‘iye-i mezbûre da‘vâ-yı mezkûresiyle zevcân-ı merkūmâna bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu.
Fî 9 min-L sene 1205
|