Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 587 Hüküm no: 916 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin vakıf hamamın gelirlerinden aldığı parayı vakfın cabisi Hafız Mehmed Efendi’ye teslim etmesi Ma‘rûz; Ashâb-ı hayrâtdan merhûm el-Hâc Ahmed Paşa Vakfı’nın hâlâ berât-ı âlî-şân ile câbisi olan Hafız el-Hâc Mehmed Efendi b. Ahmed nâm kimesne medîne-i Üsküdar Bâb Mahkemesi’nde meclis-i şer‘-i hatîrde diğer el-Hâc Mehmed Efendi b. İbrahim mahzarında mezbûr diğer el-Hâc Mehmed Efendi benden mukaddem vakf-ı mezbûrun câbîleri olan Mehmed Tâhir ve es-Seyyid Osman taraflarından vekîl olup vekâleten birkaç sene vakf-ı mezbûr müstecirlerinden icârâtı ahz edip hâlâ vekâletden ihrâc ve vakf-ı mezbûrda aslâ alâkası yoğiken vakf-ı mezbûr musakkafâtından medîne-i mezbûrede Mirâhor mahallesinde vâki‘ hamamın bin iki yüz beş senesinin bir senelik yüz elli guruş icâresini müsteciri gāib ani’l-meclis yedinden fuzûlî ahz etmekle hâlâ taleb ederim deyü da‘vâ ve mezbûr diğer el-Hâc Mehmed Efendi cevâbında fi’l-hakīka vakf-ı mezbûrda mukaddemâ câbî vekîli olduğuma binâen sâir müstecirler zimmetlerinde bakāyâ alacağım olup mahsûb ve takas ederim zannıyla hamam-ı mezkûrun bir senelik yüz elli guruş icâresini gāib-i mezbûrdan ahz eyledim deyü ikrâr ü i‘tirâf etmeğin mûcebiyle meblağ-ı merkūm yüz elli guruşu müdde‘î-i mezbûra edâsıyla mezbûr diğer el-Hâc Mehmed Efendi[ye] tenbîh ve ilzâm olunduğu bi’l-iltimâs huzûr-ı âlîlerine i‘lâm olundu. Fî-gurrei Rebî‘i’l-evvel sene 1206