Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 588 Hüküm no: 919 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası ölen Ayşe Hanım’ın küçük çocuğunu kayınpederine teslim etmesi Ma‘rûz; Mahrûse-i Galata muzâfâtından kasaba-i İstinye’de sâkin sâhib-i arzuhâl Abdullah Ağa b. Abdullah nâm kimesne medîne-i Üsküdar’da meclis-i şer‘-i hatîrde derûn-ı arzuhâlde ismi mezkûre mu‘arrefetü’z-zât Âişe bt. Ali nâm hatun muvâcehesinde bundan akdem vefât eden sulbî oğlum Mehmed’in firâşından hâsıl ve mezbûre Âişe Hatun’dan mütevellid işbu hâzır bi’l-meclis Ali nâm sagīr vâlidesi mezbûre Âişe Hatun’un bi-hakkı’l-hıdâne hacr ve terbiyesinde iken mezbûre Âişe Hatun nefsini sagīr-i mezbûra ecnebîye tezvîciyle hakk-ı hidânesi sâkıta ve sagīr-i mezbûr Ali’nin benden gayri velîsi dahi olmamağla sagīr-i mezbûru bana teslîme mezbûre Âişe Hatun’a kıbel-i şer‘den tenbîh olunmak bi’l-velâye matlûbumdur deyü da‘vâ ve mezbûre Âişe Hatun dahi ber-vech-i muharrer ikrâr ü i‘tirâf etmeğin mûcebiyle sagīr-i mezbûr Ali’yi ceddi merkūm Abdullah Ağa’ya teslîme mezbûre Âişe Hatun’a tenbîh olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 4 min-Ra sene 1206