Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 589 Hüküm no: 921 Orijinal metin no: [75a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın boşandığı kocası Osman b. Halil ile çocuklarının nafaka ve bakımı konusunda anlaştığı Ma‘rûz; Medîne-i Üsküdar’da Hasanağa mahallesinde sâkine mu‘arrefetü’z-zât Fatıma bt. Osman nâm hatun mahfil-i bâbda meclis-i şer‘-i hatîrde zevc-i sâbıkı Osman b. Halil mahzarında işbu yedimde olan hüccet-i nafaka mantûkunca zevc-i sâbıkım mezbûrun firâşından hâsıllar ve benden mütevellidler sadrî sagīr evlâdlarım es-Seyyid Hüseyin ve Şerife Ümmügülsüm’ün beher şehr beşer guruş nafaka-i mefrûza-i müstedânelerinden târih-i i‘lâma gelince sekiz ayda zimmetinde müctemi‘ olan kırk guruşu mezbûr Osman’dan taleb ederim deyü da‘vâ ol dahi cevâbında mezbûr es-Seyyid Hüseyin’in nafakası olan yirmi guruş deyni olduğunu ikrâr ü i‘tirâf edip lâkin sagīre-i mezbûre Şerife Ümmügülsüm on üç yaşını tekmîl edip hakk-ı hidânesi sâkıt olmağla nafakası olan yirmi guruşdan zimmetim berî’e olmuşdur deyü beynlerinde ba‘de-vukû‘ı’l-münâza‘a bâ-tavassut-ı muslihîn mezbûr Osman oğlu mezbûr es-Seyyid Hüseyin’in nafakası olan meblağ-ı merkūm yirmi guruşu müdde‘iye-i mezbûre Fatıma Hatun’a edâ ve teslîm edip ol dahi ba‘de’l-ahz mezbûre Şerife Ümmügülsüm’ün yirmi guruş nafakasından zevc-i sâbıkı mezbûrun zimmetini ba‘de’l-ibrâ ve’l-kabûl sagīre-i mezbûre Şerife Ümmügülsüm’ü mezbûre Fatıma Hatun kendi mâlından teberru‘an infâk ve iksâ etmek üzere ta‘ahhüd ve babası mezbûr Osman dahi bi’t-terâzî vâlidesi yedinde ibkā ve bu vechile kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 24 min-Safer sene 1206