Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 590 Hüküm no: 923 Orijinal metin no: [75a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Ali’nin hizmeti karşılığında hak ettiği ücretini aldığı Ma‘rûz; Medîne-i Üsküdar’da Davudpaşa mahallesinde sâkin İsmail b. Ali nâm kimesne medîne-i mezbûrede mahfil-i bâbda meclis-i şer‘-i hatîrde kendi nefsinden asıl ve kayınpederi el-Hâc Yahya b. Abdullah nâm kimesnenin vekîl-i müsecceli olan el-Hâc Mehmed b. Bekir nâm kimesne mahzarında ben ücret ile hizmet eder makūlesinden olup mezbûrânın talebiyle kendilere yedi ay hizmet etmemle şühûr-ı mezkûrede müstehak olduğum ecr-i mislim ile nısf yıllığım mukābelesinde mezbûr el-Hâc Mehmed bana nakden beş guruş ile mecmû‘-ı kıymetleri yirmi dört buçuk guruşa bâliğ bir entari ve bir şal ve bir kebe ve bir barata ve bir dizlik ve bir alaca entari ve bir gömlek ve def‘a şalî entari ve bir şalî cebesini def‘ ü teslîm eyledikde ben dahi ahz ü kabz eyleyip ziyâde ecr-i misline ve yıllığına ve bi’l-cümle sâire hukūka müte‘allika âmme-i de‘âvîden mezbûr el-Hâc Yahya ile vekîl-i mezbûr el-Hâc Mehmed’den her birinin zimmetini ibrâ ve ıskāt eylediğimde vekîl-i mezbûr dahi bana medfû‘u olan meblağ-ı merkūm ile eşyâ-i muharrere-i mezkûreye ve bi’l-cümle sâire müte‘allika âmme-i de‘âvîden asâleten ve vekâleten benim zimmetimi ibrâ ve ıskāt ve her birimiz âharın ber-vech-i muharrer ibrâsını kabûl eyledik deyü müdde‘î-i mezbûr İsmail’in ikrârını vekîl-i mezbûr el-Hâc Mehmed ba‘de’t-tasdîk bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-M sene 1206