Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 591 Hüküm no: 924 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa’nın boşadığı eşine mehrini taksitle ödeyeceği Ma‘rûz; Medîne-i Üsküdar’da Hayreddin Çavuş mahallesinde sâkine mu‘arrefetü’z-zât Habibe bt. Ömer nâm hatun medîne-i mezbûrede mahfil-i bâbda meclis-i şer‘-i hatîrde zevc-i mutallıkı es-Seyyid Mustafa b. ( ) nâm kimesne mahzarında ben mezbûr es-Seyyid Mustafa’nın otuz guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan yüz gün mukaddem ben li-ecli’l-maslaha Tekfurdağı nâm kasabaya râhî olacak olduğumda bana hitâb edip eğer sen iki ay tamamında gelip bana vâsıl olmaz isen benden boş ol deyü şart ve ta‘lîk edip ben dahi iki ay mürûr edip bir ay sonra üç ay tamamında vâsıl olmamla şart-ı mezkûrun vukū‘ına binâen mârrü’z-zikr otuz guruş mehr-i müeccelim ile bakıye-i iddet-i nafakamı hâlâ taleb ederim deyü da‘vâ etdikde zevci mezbûr Mustafa ber-vech-i muharrer şart ve ta‘likini ve vukū‘-ı şartı bi’l-cümle ikrâr ü i‘tirâf edip lâkin meblağ-ı merkūm otuz guruşun on beş guruşunu hâlen edâ ve mâ‘adâ on beş guruşunu edâya iktidârı olmayıp tecîle tâlib olmağla müdde‘iye-i mezbûre dahi târih-i i‘lâmdan on beş gün tamamında meblağ-ı bâkī on beş guruşu kendiye edâ etmek üzere tecîl eylediğinde ol dahi müeccelen edâya ba‘de’t-ta‘ahhüd bakıye-i nafaka-i iddet-i ma‘lûme ve meûnet-i süknâsı içün bi’t-terâzî takdîr olunan beher şehr tamamında üçer guruşu dahi edâya ta‘ahhüd ve mezbûre Habibe Hatun dahi râzıye olduğu bi’l-iltimâs huzûr-ı âlîlerine i‘lâm olundu. Fî 20 min-M sene 1206