Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 591 Hüküm no: 925 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Osman’ın kendisine küfreden eski kayınvalidesini affettiği Ma‘rûz; Medîne-i Üsküdar’da Hayreddin Çavuş [mahallesinde] sâkin Molla Osman b. Mehmed medîne-i mezbûrede mahfil-i bâbda meclis-i şer‘-i hatîrde Sâbıkā kayınvâlidesi mu‘arrefetü’z-zât Âişe bt. Halil mahzarında mezbûre Âişe târih-i i‘lâma gelince defa‘âtile ve bir gün mukaddem menzilim kapısı önünde ve dükkânım önünde bana ve gāib ani’l-meclis zevceme bi-gayrı hakkın mûcib-i ta‘zîr olur elfâz-ı kabîha ile bi’l-muvâcehe şetm etmekle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn meccânen fâriğ olup mezbûre Âişe dahi fî-mâ ba‘d mezbûr Molla Osman’a hilâf-ı şer‘ itâle-i lisân etmeyip ve eğer fî-mâ ba‘d biz dahi müdde‘î-i merkūma hilâf-ı şer‘ kelimât ile şetm eder ise hakkında lâzım gelen her türlü tedîbât ve cezâ icrâ olunmasına râzı ve ta‘ahhüd eyledikden sonra mezbûre Âişe’nin hâlâ zevci işbu hâzır bi’l-meclis İbrahim Beşe b. el-Hâc Mehmed nâm kimesne dahi ber-vech-i muharrer ta‘ahhüdüne ve nefsine kefîl ve dâmin olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 2 min-Ra sene 1206