Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 592 Hüküm no: 926 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ali’nin annesine olan nafaka borcunu ödemesi Ma‘rûz; Medîne-i Üsküdar’da Vâlide-i Atik mahallesinde sâkine mu‘arrefetü’z-zât Emetullah bt. Hüseyin nâm hatun medîne-i mezbûrede mahfil-i bâbda meclis-i şer‘-i hatîrde kebîr oğlu Osman b. Ali nâm kimesne mahzarında ben fakīre ve mu‘sire olduğuma binâen işbu yedimde olan bir kıt‘a hüccet-i şer‘iye nâtıka olduğu üzere oğlum mezbûr Osman üzerine kıbel-i şer‘den takdîr olunan külle yevm üçer para nafaka-i müstedânemden bin iki yüz beş senesi Saferi’l-hayr’ının sekizinci gününden işbu bin iki yüz altı senesi Saferi’l-hayr’ın sekizinci gününe gelince bir senede zimmetinde müctemi‘a olan yirmi sekiz guruş ve yine mukaddemâ bâ-i‘lâm-ı şer‘î mahkûmün-bih olan nafaka-i mefrûza-i mezkûremden bâkī dokuz guruş ki cem‘an otuz yedi guruş zimmetinde hakkım olmağla taleb ederim deyü da‘vâ ol dahi cevâbında meblağ-ı mecmû‘-ı merkūm otuz yedi guruşu defâ‘atle tamamen yedine teslîm etmiş idim deyü eylediği def‘ini beyân ve isbâta kādir olamayıp talebiyle vâlidesi müdde‘iye-i mezbûre Emetullah hatun gıbbe’t-tahlîfi’ş-şer‘î mûcebiyle meblağ-ı merkūm otuz yedi guruşu müdde‘iye-i mezbûreye edâ ve teslîme oğlu mezbûr Osman’a tenbîh olunduğu bi’l-iltimâs huzûr-ı âlîlerine i‘lâm olundu. Fî 26 min-S sene 1206