Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 593 Hüküm no: 928 Orijinal metin no: [75b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Murtaza’nın Zeliha Hanım’dan kiraladığı bahçenin kira ücretini ödeyip vakti gelince tahliye edeceği Ma‘rûz; Medîne-i Üsküdar’da Arakıyeci el-Hâc Cafer mahallesinde sâkine mu‘arrefetü’z-zât Zeliha bt. İsmail nâm hatun meclis-i şer‘-i hatîrde Bağçevân Ali b. Murtaza nâm kimesne mahzarında mezbûr Ali mahalle-i mezbûrede vâki‘ ma‘lûmü’l-hudûd bir kıt‘a bağçemi bir sene tamamına değin yirmi beş guruş ücret tesmiyesiyle istîcâr ve ücret-i merkūmenin on üç guruşunu yedinden ahz, on iki guruşu zimmetinde bâkī kalmağla taleb ederim deyü da‘vâ ve mezbûr Ali cevâbında cihet-i mezkûreden bâkī on iki guruş deyni olduğunu ikrâr lâkin müdde‘iye-i mezbûre müddet-i icâre tamamından dört ay mukaddem beni bağçe-i mezkûreden ihrâc edip bağçe-i mezkûrede benim amelim ile hâsıl olan mahsûlâtımı kabz ve istihlâk etmiş idi deyü beynlerinde ba‘de-vukū‘ı’l-münâza‘a bâ-tavassut-ı muslihîn müdde‘iye-i mezbûre eylediği on iki guruş da‘vâsından meccânen fâriğa olup hâlâ bağçe-i mezkûrede mevcûde pırasa ve lahana ve sâir sebzevâtını işbu rûz-ı Kasım’ından on gün mürûruna değin bağçeden ahz ü intifâ‘ etmek üzere mukāvele eyledikde ol dahi râzı olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-S sene 1206