Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 593 Hüküm no: 929 Orijinal metin no: [75b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın İbrahim Ağa’dan alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Ayazma mahallesinde sâkine mu‘arrefetü’z-zât Âişe bt. İbrahim nâm hatun meclis-i şer‘-i hatîrde İbrahim Ağa b. el-Hâc Süleyman nâm kimesne mahzarında mukaddemâ mezbûr İbrahim Ağa yedinden dört yüz guruş istidâne ve mukābelesinde mahalle-i mezbûrede vâki‘ bir bâb vakıf menzilimi vefâen ferâğ edip menzil-i mezkûr ücreti olmak üzere beher şehr beşer guruşdan yirmi ayda yüz guruş vermiş idim lâkin menzil-i mezkûr tahliye ve teslîm olunmamağla medfû‘um olan yüz guruşu taleb ederim deyü da‘vâ ve mezbûr İbrahim Ağa cevâbında iki sene mukaddem müdde‘iye-i mezbûre meblağ-ı merkūm yüz guruşu benden da‘vâ ve bâ-tavassut-ı muslihîn altmış guruş bedel-i makbûza benim ile sulh olup ben dahi sulh-ı merkūmu kabûl ve ziyâde müdde‘âsı olan kırk guruşa müte‘allika âmme-i de‘âvîden benim zimmetimi ibrâ ve ıskāt ben dahi ibrâsını kabûl etmiş idim deyü ba‘de’d-def‘ ve’l-inkâr dâfi‘-i mezkûr def‘-i mezkûrunu udûlden es-Seyyid Osman b. Ömer ve Ali b. el-Hâc Mehmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘iye-i mezbûre husûs-ı mezkûrda mezbûr İbrahim Ağa’ya bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 29 min-M sene 1206