Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 441 Hüküm no: 472 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Vehbi Efendi’ye arsasını ehl-i zimmete satışına izin verildiği Bâ-mühr-i hazret-i efendi. Ma‘rûz. Vârid olan fermân-ı âlîlerine imtisâlen kıbel-i şer‘den irsâl olunan kâtib dâ‘îleri sâhib-i arzuhâl es-Seyyid Vehbi Efendi dâ‘îlerinin derûn-ı arzuhâlde mezkûr arsası üzerine varıp ba‘de’l-mu‘âyene fi’l-hakīka arsa-yı mezkûre bir tarafdan kendi yedlerinde mülkleri olan fevkānî ve tahtânî büyût-ı adîdeyi muhtevî menzil ve bir tarafdan Papados ve Zeynel ve Anaştaş ve Dursun ve Ebekli nâm zimmîler mülkleri ve iki tarafdan tarîk-i âm ile mahdûd ve müfrez ve Müslim ve kefere mahlût olmağla Müslim rağbet etmeyip kendilere dahi lüzûmu olmamağla ehl-i zimmete bey‘ olundukda kimesneye zarar-ı şer‘îsi yokdur deyü Mahallesi imâmı Abdullah Efendi ve Müezzin Mustafa Halîfe ve ahâlîsinden el-Hâc Hüseyin ve es-Seyyid İsmail ve el-Hâc İbrahim ve Mustafa b. Mehmed ve Abdullah b. Abdullah ve Ebûbekir Beşe nâm kimesneler ihbâr ettiklerini mahallinde tahrîr ve ma‘an ba‘s olunan Çukadâr Abdullah ve Muhzır Abdullah ile meclis-i şer‘a gelip alâ-vukū‘ihî ba‘de’l-inhâ arsa-yı mezkûreyi ber-mûceb-i fetvâ-yı şerîfe ber-vech-i muharrer bey‘e mûmâ-ileyh dâ‘îlerine kıbel-i şer‘den izin verildiği huzûr-ı âlîlerine i‘lâm olundu. Fermân men-lehü’l-emr hazretlerinindir. Fî 3 Rebî‘ülevvel sene [1]143.