Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 599 Hüküm no: 942 Orijinal metin no: [76b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Çukadar Ali ve eşinin bulundukları mahalleden çıkarılmaları Ma‘rûz; Medîne-i Üsküdar’da Toygar Hamza mahallesi ile civârında olan mahallât ahâlisinden İmâm es-Seyyid Mehmed Tâhir Efendi ve İmâm Süleyman Efendi ve İmâm Hafız Mehmed Kadri Efendi ve eş-Şeyh Ahmed Efendi ve İsmail Ağa ve el-Hâc Ali Efendi ve Hüseyin Ağa ve el-Hâc Mustafa Efendi ve el-Hâc Hasan ve Mehmed Ağa ve Ali Efendi ve Mustafa Ağa ve Hasan Ağa ve Ahmed Ağa ve Mustafa Ağa ve Mehmed Ağa ve diğer Mehmed Ağa ve Mustafa ve el-Hâc Abdi ve el-Hâc Ahmed Ağa ve es-Seyyid Hüseyin Ağa ve diğer el-Hâc Ahmed nâm kimesneler bi-ecma‘ihim meclis-i şer‘-i hatîrde yine mahalle-i mezbûre sükkânından Kahveci Çukadâr Ali b. Osman ve zâtı mu‘arrefe Fatıma bt. Ali nâm zevcân-ı mezbûrân kendi hâllerinde olmayıp dâimâ ehl-i ırz kimesnelerin iyâli ve evlâdlarına sû-i kasd ile ıdlâl etmek âdet-i müstemirreleri olduğuna binâen bu esnâda mahalle-i mezbûre sükkânından hem-civârlarından işbu hâzır bi’l-meclis Cebeci Çorbacısı Veli Ağa b. Mahmud kendi hâlinde ırzıyla mukayyed ve bir ferde hilâf-ı şer‘-i şerîf nâ-hemvâre hareketi yoğiken zevcân-ı mezbûrân müsâferet tarîkiyle mezbûr Veli Ağa’nın menziline duhûl ve bir takrîb kerîmesi gāibetü ani’l-meclis Zeliha nâm bikr-i bâliğayı ıdlâl ve kerîmesi mezbûre[ye] cihâz olmak üzere tedârik eylediği ber-mûceb-i defter-i müfredât beynlerinde ma‘lûm emvâl ve eşyâ ve huliyyisini ceste ceste kendi menzillerine nakl, ba‘dehû kerîmesi mezbûreyi dahi bir takrîb kendi menzillerine götürüp babası mezbûr vâkıf oldukda ma‘rifet-i şer‘ ve ahâli-i mahallesi ma‘rifetiyle gerek eşyâyı ve gerek kerîmesi mezbûreyi zevcân-ı mezbûrânın menzil-i mezkûrlarından ihrâc edip ikrârlarıyla mezbûr Veli Ağa’ya teslîm olunup bu vechile tekdîr ve ızrâr ve hetk-i ırz etmeleriyle zevcân-ı mezbûrândan bi’l-külliye emniyetimiz meslûb olmuşdur deyü bi-ecma‘ihim ber-vech-i muharrer sû-i hareketlerini zevcân-ı mezbûrân muvâcehelerinde ihbâr ve fî-mâ ba‘d mahalle-i mezbûrede meks ve ikāmet [etmemek] üzere mahalleden ihrâcı bâbında fermân-ı âlîleri sudûrunu istid‘â ve istirhâm eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 20 min-Rebî‘ülevel sene 1206