Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 600 Hüküm no: 943 Orijinal metin no: [76b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hasan’ın borcunu ödemesi Ma‘rûz; Medîne-i Üsküdar’da Selami mahallesinde sâkin Hüseyin b. Hasan medîne-i mezbûrede mahfil-i bâbda meclis-i şer‘-i hatîrde Mehmed b. Hasan mahzarında târih-i i‘lâmdan dört sene mukaddem sermâye mezbûr Mehmed’in ve amel benim olup ve fâide-i hâsıla beynimizde münâsefeten taksîm olmak üzere âhardan iştirâ ve kabz eylediğimiz beynimizde ma‘lûm zehâiri âhara bey‘ ve fâidede[n] otuz guruş hâsıla olup bana isâbet eden on beş guruş hissem mezbûr Mehmed yedinde kalmağla taleb ederim deyü ba‘de’d-da‘vâ ve’l-istintâk mezbûr Mehmed cevâbında ber-vech-i muharrer meblağ-ı merkūm on beş guruş ahzını ikrâr, lâkin mukaddemâ mezbûr Hüseyin ile Gemlik kazâsından gelir iken emriyle kumanya ve sâir masrûfâtına sarf etmiş idim deyü eylediği def‘ini isbâta kādir olamayıp talebiyle müdde‘î-i mezbûr Hüseyin gıbbe’t-tahlîfi’ş-şer‘î mûcebiyle meblağ-ı merkūm on beş guruşu müdde‘î-i mezbûra edâya mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Şevvâl sene 1205