Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 601 Hüküm no: 944 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın boşandığı kocası Ahmed’den alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Mirâhor mahallesinde sâkine ve zâtı mu‘arrefe sâhibe-i arzuhâl Hadice bt. Ali nâm hatun Çarşamba günü Dîvân-ı âlî’de ba‘dehû Üsküdar Mahkemesi’nde meclis-i şer‘-i hatîrde zevc-i sâbıkı arzuhâlde ismi mezkûr el-Hâc Ahmed b. İbrahim nâm kimesne mahzarında ben mezbûr el-Hâc Ahmed’in bundan akdem yüz guruş mehr-i müeccel tesmiyesiyle zevce-i medhûlün-bihâsı iken iki ay mukaddem beni tatlîk etmekle zimmetinde mütekarrir ve ma‘kūdun-aleyh olan mehr-i müeccel-i mezkûr yüz guruş ile hîn-i akdde mehr-i mu‘accel olmak üzere tesmiye olunup hâlâ yed ve zimmetinde olan ber-mûceb-i defter-i müfredât eşyâ-i mütenevvi‘a-i ma‘lûmemi taleb ederim deyü da‘vâ ve mezbûr el-Hâc Ahmed cevâbında fi’l-hakīka müdde‘iye-i mezbûre yüz guruş mehr-i müeccel tesmiyesiyle zevce-i medhûlün-bihâsı olduğunu ikrâr lâkin târih-i merkūmda beni yine medîne-i mezbûre mahkemesinde meclis-i şer‘a ihzâr ve hul‘a tâlibe olduğu hâlde mehr-i müeccel-i mezkûra ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere benim ile muhâla‘a olup bi’l-cümle gerek hukūk-ı zevciyete ve gerek hukūk-ı sâire müte‘allika âmme-i de‘âvîden benim zimmetimi ibrâ ve ıskāt edip ben dahi ibrâsını kabûl edip kıbel-i şer‘den yedime bir kıt‘a hüccet-i şer‘iye i‘tâ olunmuş idi deyü takrîr-i meşrûhuna mutâbık bir kıt‘a hüccet ibrâzıyla ba‘de’d-def‘ ve’l-ikrâr mûcebiyle müdde‘iye-i mezbûre da‘vâ-yı mezkûresiyle zevc-i sâbıkı mezbûr el-Hâc Ahmed’e bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 17 min-Ra sene 1206