Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 602 Hüküm no: 947 Orijinal metin no: [77a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Ahmed Ağa’nın borcunu ödemesi Ma‘rûz; Medîne-i Üsküdar’da Hacce Hatun mahallesinde sâkin Haseki Ahmed Ağa b. İbrahim mahfil-i bâbda meclis-i şer‘-i hatîrde mukaddemâ hizmetkârları Hasan b. Ali ve Ali b. Musa mahzarında mezbûrân Hasan ve Ali târih-i i‘lâmdan iki ay mukaddem memûriyetimiz olan vilâyet-i Anadolu’da Bağlan kazâsına tâbi‘ Aslıçal nâm mahâlde mezbûr Hasan hurc-ı heybemden nakden yüz guruşumla silk-i mülkümde münselik emlâkimden mezbûr Hasan’ın eyer bisatıyla elli sekiz guruş kıymetli bir re’s demir kırı atımı esnâ-i râhda yedimden bi-gayrı hakkın fuzûlî ahz ü kabz etmeleriyle hâlâ mezbûrândan taleb ederim deyü ba‘de’d-da‘vâ ve’l-istintâk mezbûr Hasan meblağ-ı merkūm yüz guruş ahzını inkâr ve müdde‘î-i merkūmun ityân-ı beyyineden izhâr-ı aczle bi’t-taleb mezbûr Hasan gıbbe’t-tahlîfi’ş-şer‘î müdde‘î-i mezbûr meblağ-ı merkūm yüz guruş mutâlebesiyle bilâ-beyyine mu‘ârazadan ba‘de’l-men‘ müdde‘î-i merkūmun mezkûrân atlar içün benim değildir memleket ağasınındır mezbûrândan her birine alâ-tarîki’l-âriye vermiş idim deyü tasaddî eylediği da‘vâsı meşrû‘a olmayıp mezbûr Hasan müdde‘î-i mezbûrun emriyle esnâ-i râhda nüzûl hanlarda dokuz buçuk guruş masrûfum olmağla taleb ederim deyü eylediği da‘vâsını beyâna kādir olmayıp bi’t-taleb mezbûr Haseki Ahmed Ağa’ya yemîn teklif oldukda yemînden nükûl etmeğin mûcebince meblağ-ı merkūm dokuz buçuk guruşu müdde‘î-i mezbûr Hasan’a edâsıyla mezbûr Haseki Ahmed Ağa ilzâm olunduğu bi’l-iltimâs huzûr-ı âlîlerine i‘lâm olundu. Fî 9 min-Ra sene 1206