Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 603 Hüküm no: 949 Orijinal metin no: [77a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Abdullah b. Mehmed’in Derviş Cemaleddin’den alacaklı olduğu iddiasını ispatlayamadığı Ma‘rûz; Medîne-i Üsküdar’da Solaksinan mahallesinde vâki‘ Hindîler Zâviyesi’nde misâfiren sâkin Hindî Derviş Abdullah b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde Derviş Cemaleddin b. el-Hâc Tevfik nâm Hindî muvâcehesinde mezbûr Derviş Cemaleddin târih-i i‘lâmdan bir ay mukaddem Şâm-ı Şerîf’de yedimden iktirâz ve kabz ve umûruna sarfla istihlâk eylediği altmış beş guruş hakkım ile Şâm-ı Şerîf’de bi-tarîki’l-emâne yedine vaz‘ ve teslîm eylediğim emlâkimden mecmû‘-ı kıymetleri on dört guruşa bâliğ bir alaca entari ve bir şalvar ve bir post ve bir çift çizmemi bana teslîm etmeyip yedinde olmağla hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâtdan izhâr-ı acz edip talebiyle mezbûr Derviş Cemaleddin gıbbe’t-tahlîfi’ş-şer‘î mûcebiyle müdde‘î-i mezbûr Derviş Abdullah da‘vâ-yı mezkûresiyle mezbûr Derviş Cemaleddin’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 21 min-Ra sene 1206